Shqipëria ka reduktuar kërkesat për azil në vendet e Bashkimit Europian, krahasuar me vitin 2015.
Zyra europiane për azil, në raportin vjetor të publikuar ditën e djeshme sipas të cilit vendi ynë është një ndër 10 vendet me numrin më të lartë të kërkesave për azil në vendet e Bashkimit Europian.
Shqipëria për 2016 ka pasur rreth 3 për qind të totalit të aplikacioneve, duke u radhitur pas Sirisë, Afganistanit dhe Irakut, por në krah me Somalinë dhe Eritrean.
Shqipëria është edhe vendi me reduktimin më të lartë të shifrave të azilantëve krahasuar me 2015, por kjo nuk na zbret nga lista e dhjetëshes me numrin më të lartë të aplikimeve për azil.
Shqipëria ndodhet në mesin e 10 vendeve me numrin më të lartë të kërkesave për azil në vendet e Bashkimit Europian. Të dhënat janë paraqitur në raportin vjetor të zyrës europiane për azil, publikuar në faqen e saj zyrtare. Në vendin e parë ndodhet Siria, ku kërkesat për azil nga ky vend përbejnë 26 për qind të totalit të aplikacioneve në Bashkimin Europian.
Afganistani renditet në vendin e dytë, me 15 për qind të totalit, pasuar nga Iraku me 10%. Më pas vjen Pakistani me 4%, Nigeria po 4%, Irani 3%, Eritrea 3%, Shqipëria 3% , Somalia 2% dhe Rusia 2%. Ndërsa gjashtë vite pas fillimit të konfliktit në Siri, numri i aplikimeve për azil i paraqitur nga sirianët në vitin 2016 arriti në 242 mijë, një rënie me 11 për qind krahasuar me një vit më parë. Siria ka mbetur shtetësia kryesore e aplikantëve të mbrojtjes ndërkombëtare që nga viti 2013.
Nga ana tjetër, raporti tregon dhe ilustron me grafikë se rritje të aplikantëve për azil gjatë 2016 ka shënuar Nigeria dhe Irani, të pasuar nga Guinea, Maroku dhe Bregu i Fildishtë. Kurse reduktimet më të mëdha janë shënuar në Shqipëri, Kosovë, Serbi dhe Mal të Zi. Ndërkohë aplikimet e shtetasve të Ballkanit Perëndimor ranë në 2016 pasi BE u përball me një fluks masiv refugjatësh gjatë gjysmës së parë të 2015. Pavarësisht zvogëlimit, aplikantët shqiptarë kanë mbetur në mesin e 10 vendeve me numrin më të lartë të aplikantëve për azil në vendet e Bashkimit Europian.
Gjatë 2016, gjithsej ka pasur rreth 1.3 milionë aplikime për mbrojtje ndërkombëtare në BE, duke shënuar një rënie prej 7% krahasuar me vitin 2015, kur u paraqitën afër 1.4 milionë aplikime. Vendet kryesore pritëse janë Gjermania, Italia, Franca, Greqia dhe Austria.