Poznanj, 4 korrik – Ministrja bullgare e Punëve të Jashtme, Ekaterina Zaharieva, deklaroi se vendi i saj nuk do të vendosë kushte të reja për Maqedoninë e Veriut për fillim të negociatave me Bashkimin Evropian, por se dëshiron të zgjidhen kontestet historike.
Duke u përgjigjur në pyetje të gazetarëve në suaza të Samitit për Ballkanin Perëndimor që po mbahet në Poznanj, lidhur me atë përse ajo dhe kryeminsitri Bojko Borisov janë përzier në debatin për figurat historike të cilat i ndajnë Maqedonia e Veriut dhe Bullgaria, Zaharieva porositi se kjo i referohet faktit që në të kaluarën historia është përdorur për qëllime politike.
“Kur politikanë nga e kaluara keqpërdorin të vërteta historike dhe luajnë me to, u sollëm në këtë pikë që të mos ketë lidhje të afërta mes dy vendeve tona”, theksoi ministrja bullgare e Punëve të Jashtme, por theksoi se Sofja nuk do të vendosë kushte të reja në rrugën evropiane të Maqedonisë së Veriut.
“Nuk vendosim kushte të reja, marrëdhëniet fqinjësore janë përmbajtur në marrëveshjen për miqësi”, tha Zaharieva dhe shtoi se vendi i saj vetëm dëshiron marrëdhënie të mira fqinjësore.
Ajo përkujtoi se Bullgaria e para e njohi pavarësinë e shtetit tonë dhe se ishte mes të parave që e ratifikuan protokollin inkuadrues për në NATO, duke dëshmuar se e mbështetë perspektivën euroatlantike të vendit.
Shefja e diplomacisë bullgare theksoi edhe se vendi i saj ishte në krye të BE-së vitin e kaluar kur u vendos të fillohen negociatat inkuadruese me Maqedoninë e Veriut dhe Shqipërinë.