Partia opozitare VMRO-DPMNE, kërkon që ministri i Punëve të Brendshme, Oliver Spasovski dhe drejtori i Agjencisë për Siguri Kombëtare (ASK) Viktor Dimovski, të japin dorëheqje, për shkak të skandalit me nënshtetësinë e oligarkut pro-rus, Oleksandar Onishçenko.
Nga kjo parti thonë se “ky skandal e rrënon të gjithë sistemin e sigurisë dhe institucionet e shteti, si dhe e shkatërron besueshmërinë e Agjencisë për Siguri Kombëtare.
“Ligji i Agjencisë së Sigurisë Kombëtare është i qartë dhe nëse do të ishte zbatuar, Onishçenko në vend që të merrte nënshtetësinë e Maqedonisë do të ekstradohej në Ukrainë. Është skandaloze që për gati dy javë institucionet në vend nuk mund të marrin vesh se si Onishçenko e ka marrë nënshtetësinë e Maqedonisë dhe kryeministri Kovaçevski në vend që të kërkojë përgjegjësi nga Dimovski dhe ta shkarkojë menjëherë, e dërgon për ambasador në Francë”, kanë deklaruar nga VMRO.
Ata kanë shtuar se deklaratat e ministrit Spasovski janë edhe më skandaloze, pasi vet fakti që Onishçenko është në listën e zezë të SHBA-ve nuk do të thotë se ai është kriminel, dhe më tej i minon pozitat dhe ndikon negativisht në rejtingun e Maqedonisë me aleatin tonë strategjik, SHBA-në. “Nga reformat e suksesshme në sistemin e sigurisë, Spasovski mund të mburret vetëm me bashkëpunim të suksesshëm me mafiet e botës së drogës dhe dhënien e pasaportave maqedonase për kriminelët dhe bosët e drogës”, nënvizojnë nga VMRO.