Në shkallën prej 1 deri 5, nga shërbimet që më së shpeshti shfrytëzohen nga qytetarët e anketuar del se notën më të lartë – 3.48 e ka fituar Ministria e Punëve të Brendshme në pjesën e lëshimit të dokumenteve personale dhe të udhëtimit, pasojnë shërbimet e Drejtorisë së Librave Amë me notë 3.45, sistemi shëndetësor me 2.79, Agjencia e Punësimit me 2.41 dhe ajo e ndihmës sociale si shërbim i Qendrave për punë sociale me 2.39 …
Fisnik PASHOLLI
Shkup, 30 korrik – Vetëm 20 për qind e qytetarëve janë të kënaqur me shërbimet e shpejta dhe cilësore që i fitojnë nga administrata publike. Njëherazi, endja nga një sportel në tjetrin paraqet problemin më të madh konkret që mundon qytetarët, shkruan gazeta KOHA.
Në shkallën prej 1 deri 5, nga shërbimet që më së shpeshti shfrytëzohen nga qytetarët e anketuar del se notën më të lartë – 3.48 e ka fituar Ministria e Punëve të Brendshme në pjesën e lëshimit të dokumenteve personale dhe të udhëtimit, pasojnë shërbimet e Drejtorisë së Librave Amë me notë 3.45, sistemi shëndetësor me 2.79, Agjencia e Punësimit me 2.41 dhe ajo e ndihmës sociale si shërbim i Qendrave për punë sociale me 2.39.
Kjo theksohet ndër të tjerash në analizën “Sfidat dhe problemet e qytetarëve gjatë shfrytëzimit të shërbimeve të administratës publike”, të përgatitur nga ana e Qendrës për strategji evropiane “Evrotink”.
“Lidhur me problemet konkrete që hasin për të fituar shërbimet konkrete, të anketuarit me 13.9 për qind janë përgjigjur se kanë probleme me paqartësinë e procedurave apo shëtitjen nga sporteli në sportel, me 8.85 për qind janë të pakënaqur me cilësinë e dobët të shërbimeve dhe me 8.53 për qind me sjelljen e keqe apo joprofesionale të të punësuarve. Gjithashtu, me 7 për qind janë vlerësuar mungesa e profesionalizmit dhe vonesat në fitimin e shërbimeve”, thuhet më tej në analizë.
Është interesante të theksohen edhe sugjerimet e qytetarëve për përmirësimin e efikasitetit të punës së administratës, ku më së shumti kërkohet rritja e efikasitetit të punës, ulja e korrupsionit, riorganizimi i punës, anulimi i nevojës për “kapjen e lidhjeve” dhe të tjera.
Anketat në terren në të gjithë tetë rajonet e Maqedonisë apo në tërë vendin, kanë vënë në pah edhe një fakt interesant se, përkundër perceptimit se ekziston një energji negative ndaj punësimeve në bazë të Marrëveshjes së Ohrit, megjithatë vetëm 1.52 e të anketuarve e kanë theksuar këtë si problem kryesor në punën e administratës publike. Njëherësh, vetëm 6.7 për qind e të anketuarve kanë theksuar se janë për rritjen e pagave të administratës.
Vlerësimi i përgjithshëm i analizës së të dhënave tregon se qytetarët në përgjithësi janë të kënaqur me shërbimet konkrete që ju ofron administrata publike. Megjithatë, kur nevojat dhe kërkesat e qytetarëve dalin “jashtë kutisë” të praktikës së vendosur të përditshme të institucioneve, dëshmitë e qytetarëve të anketuar kanë nxjerrë në sipërfaqe mangësitë e sistemit që janë theksuar më lart.
“Emëruesi i përbashkët i të gjithë rasteve të analizuara tregon se problemi është shkaktuar kur ka pasur nevojë që nëpunësit të angazhohen në mënyrë shtesë që të zgjidhin kërkesat e tyre, apo kur për shkak të mungesës së procedurës së qartë të përcaktuar dhe standardizuar për zgjidhjen e rasteve specifike, qytetarët nuk kanë pasur mundësi të realizojnë të drejtat e tyre”, tregon më tej analiza.
Gjithashtu, problemet për të cilat qytetarët ankohen në anketat e realizuara lidhur me shërbimet shëndetësore kanë të bëjnë me Ndihmën e Shpejtë që nuk reagon menjëherë, kur theksohet se personi është më i moshuar se 65 vjeç spitalet shtetërore nuk dëshirojnë të përkujdesen për të njëjtit dhe refuzojnë të hospitalizojnë dhe operojnë persona të moshuar, andaj familjet janë të detyruara ose ti mjekojnë në shtëpi, ose ti dërgojnë privat me kosto më të lartë.
Në përgjithësi, për të gjitha shërbimet vlen se qytetarët nuk lajmërohen për procedurat që qëndrojnë në “sirtar”. Atyre ju kërkohen dokumente shtesë që nuk kanë qenë të parashikuara në kohën e parashtrimit. Bile edhe për vendime ekzekutive për refundimin e mjeteve, qytetarët janë të detyruar të bëjnë shtypje apo presion ndaj institucioneve . Gjithashtu, në kohën e cikleve parazgjedhore, administrate publike e stagnon punën e saj.
Qytetarët shpesh nuk dinë të plotësojnë formularët, ndërsa të punësuarit nuk guxojnë tu ndihmojnë. Për fitimin e ndihmës sociale nevojitet që personi të paraqitet për çdo muaj në Agjencinë e Punësimit si kërkues aktiv i ndihmës sociale, por edhe të paraqitet në mënyrë shtesë në Qendrën për punë sociale, përcjell KOHA.
Nga ana tjetër, si konstatim i përgjithshëm i hulumtimit mund të thuhet se tek të anketuarit në administratën publike, ekziston një frikë e caktuar që të flasin publikisht dhe në mënyrë transparente lidhur me vështirësitë me të cilat ballafaqohen në vendet e tyre të punës.
Krejt në fund, por jo edhe më pak e rëndësishme, “Evrotink” sugjeron që gjatë krijimit të politikave, të përfshihen edhe të punësuarit në administratë që për çdo ditë në punën e tyre ndeshen me sfida dhe probleme, si dhe qytetarët që më së miri dinë se si të artikulojnë pakënaqësitë e tyre në raport me zgjidhjet ekzistuese. (koha.mk)