Gazeta prestigjioze britanike “The Guardian” në numrin e publikuar ditën e sotme është përkujdesur me detaje duke shkruar një artikull për fitoren mbresëlënëse të shqiptarëve të Zvicrës ndaj Serbisë në kuadër të kampionatit që po zhvillohet në Rusi. Media në fjalë e nis artikullin me fundin e zjarrtë të takimit, për atë që mendoi vetëm Xherdan Shaqiri.
“Është dashur të jenë ata. Papritmas, në minutën e fundit, Xherdan Shaqiri po vraponte, serbët e ndiqnin por nuk arritën ta ndalnin para se ai të lëshonte topin nën Vladimir Stojkovicin. Ishte gol që mposhti Serbinë dhe e vuri Zvicrën në pozitë të fortë për të kaluar grupin, por kjo kishte më shumë domethënie”, ka shkruar fillimisht “The Guardian”.
“Derisa kthehet dhe bërtet, heq fanellën, shfaq muskujt dhe bën shqiponjën. Përkrah tij, Granit Xhaka e bëri të njëjtën për herë të dytë në ndeshje”, shkruan më tej prestigjiozja britanike.
Media shkruan se për dyshen e golashënuesve kjo ishte më shumë se një ndeshje mes përfaqësuesve. Ndërkohë, ajo përmend burgosjen e babait të Granitit, Ragip Xhakën që kishte protestuar për pavarësinë e Kosovës në ish-Jugosllavi.
“Xhaka barazoi, me një goditje të fuqishme prej 20 metrave, tani Shaqiri u përkujdes për fitoren. Dy kosovarë, dy golashënues, në një stadium ku rusët dhe serbët u bën bashkë për të përkrahur një ekip që Shaqiri dhe Xhaka nuk e shohin si kundërshtar të zakonshëm. Shaqiri ka flamurin e Kosovës në këpucë. Babai i Xhakës u burgos dhe u keqtrajtua në ish-Jugosllavi”, shkruan “The Guardian”.
“Së bashku me Valon Behramin, vërshëlleheshin nga turma që këndonte: ‘Serbia-Rusia! Serbia-Rusia’. Një baner i deklaroi dy shtetet si ‘vëllezër’”, e mbyll shkrimin prestigjozja.