Një zyrtar iranian ka kërkuar që të gjitha punonjëset e seksit dhe personat pa strehë mbi kokë në Teheran që janë të varur nga droga, të sterilizohen me qëllim parandalimin e një “dëmi social”. Siavash Shahrivar, udhëheqës i Departamentit për Çështje Sociale dhe Kulturore në Zyrën e Guvernatorit të Teheranit, ka thënë se prostitutat duhet të “binden” që të sterilizohen. “Ekziston një qëndrim, një realitet mbi të cilin pajtohen shumë OJQ dhe elita sociale, nëse një grua është e sëmurë dhe punonjëse seksi, e cila nuk ka asnjë vend ku mund të kalojë natën, ajo duhet sterilizuar me miratimin e saj apo edhe me forcë”, ka thënë Shahrivar për mediat iraniane. “Rreth 20% e tyre e kanë sëmundjen e SIDA-s që i bën edhe përhapëse të sëmundjeve”, ka thënë më tej Shahrivar. Mediat e Iranit shkruajnë se në Teheran janë mbi 3 mijë gra pa strehë mbi kokë.