Takim Grubi – Ageler: Sukseset e vendit tonë janë të përbashkëta me SHBA-në

Zëvendëskryeministri i parë i Qeverisë dhe ministër për Sistem Politik dhe Marrëdhënie Ndërmjet Bashkësive, Artan Grubi sot është takuar me ambasadoren e re të SHBA-së, Angela Ageler, të cilës i ka dëshiruar rikthim të suksesshëm në vendin tonë në misionin e ri diplomatik.

Në këtë takim, Grubi dhe Ageler kanë diskutuar mbi nevojën e ndryshimeve kushtetuese, integrimin e vendit në Bashkimin Europian, reformat në vend, situatën politike si dhe procesin e vetingut.

“Ndryshimet kushtetuese janë vlerësuar si të një rëndësie të veçantë për faktin se janë kusht për vazhdimin e rrugës europiane. Në takim u vlerësua se vendi nuk ka kohë për të humbur. Integrimi i mëtejshëm i Ballkanit Perëndimor në Bashkimin Europian është garanci shtesë për stabilitetin dhe prosperitetin në këtë pjesë të Evropës dhe SHBA-të si aleat të Maqedonisë së Veriut, vazhdojnë të tregojnë përkrahjen e tyre për përfundimin e procesit integrues”, theksoi Grubi.

Advertisements

Çdo sukses i vendit tonë, shtoi ai është arritur në bashkëpunim me Shtetet e Bashkuara të Amerikës.

Funksionimi i koalicionit qeveritar u vlerësua cilësor dhe Grubi theksoi se rruga evropiane kërkon një front të përbashkët të të gjitha forcave progresive, derisa SHBA-të mbeten të përkushtuara fuqishëm në mbështetje të Republikës së Maqedonisë së Veriut në rrugën e reformave për të mundësuar një demokraci funksionale dhe të qëndrueshme.

Gjatë takimit është diskutuar edhe për propozimin e vetingut që duhet të përfshijë të gjithë, që nga figurat politike, gjykatësit, dhe prokurorët si formë e luftës kundër korrupsionit dhe veprim që garanton kontroll thelbësor të funksionerëve para se të zgjidhen në detyrë.

Grubi u shpreh mirënjohës dhe falënderues për ndihmesën dhe përkrahjen amerikane për barazinë, demokracinë dhe integrimin e vendit tonë në tri dekadat e fundit.