Tiranë, 30 prill – Ish-kryenegociatorja e Kosovës në bisedimet me Serbinë, Edita Tahiri tha se samiti i Berlinit i jep fund idesë së ndryshimit të kufijve mes Kosovës dhe Serbisë.
Në një intervistë për televizionin e Tiranës Ora Njuz, Tahiri tha se Rama dhe Thaçi janë humbës që kanë gabuar historikisht.
“Ky samit i jep fund gabimeve historike të Thaçit dhe Ramës dhe na nxjerr fitues neve që ishim kundër ndryshimit të kufijve, veçmas mua më ve në pozitat fituese.Unë si kryenegociatore për shtatë vjet e kam ndaluar çdo tendencë të Serbisë që të flitet për territore. Un kam krijuar një proces të fqinjësisë së mirë dhe integrimit të veriut në Kosovë. Sot Thaçi dhe Rama e kuptuan që janë humbësit dhe janë liderë që kanë gabuar historikisht” deklaroi Tahiri.
Sipas saj, Kosova dhe Serbia të ndjekin modelin gjermano- francez për zgjidhjen e mosmarrëveshjeve.
“Ky samit i cili shpreh qëndrimin gjerman kundër ndryshimit të kufijve, pra e ndal këtë proces që do të ishte i dëmshëm dhe e ve në drejtimin e duhur që dy shtetet, Kosova dhe Serbia të ndjekin modelin gjermano- francez, i cili është një shembull inspirues, sesi dy shtete që kanë qenë në luftë zgjidhin ato mosmarrëveshjet mes tyre”, vlerëson Tahiri.
Unë jam në kontakt me autoritetet gjermane. Dhe se Merklei është e nervozuar me faktin që ka liderë “shkurtpamës që provojnë prekjen e kufijve, provojnë të kthejnë kohës pas, të rikthejnë armiqësitë e vjetra dhe luftërat e reja”.