Spasovski: Emigrantët ende përpiqen ilegalisht të tranzitojnë përmes vendit tonë

Emigrantët po përpiqen të tranzitojnë ilegalisht, në mënyrë të pavarur ose me ndihmën e kontrabandistëve, përmes Republikës së Maqedonisë së Veriut dhe më tej drejt destinacioneve të tyre të fundit. Të dhënat për vitin 2018 tregojnë një numër në rritje të përpjekjeve për kalimin e paligjshëm të kufirit jugor, ndërsa është rritur edhe numri i emigrantëve të zbuluar. Ajo që është më shqetësuese është se një numër i madh i emigrantëve të paligjshëm përpiqen të përdorin shërbimet e kontrabandimit të emigrantëve jo vetëm në vend por edhe në të gjithë rajonin.

Këtë e theksoi Ministri i Punëve të Brendshme, Oliver Spasovski, i cili zyrtarisht hapi takimin e 72-të të Drejtorisë Menaxhuese të Qendrës Ndërkombëtare për Zhvillimin e Politikave të Emigracionit (ICMPD), që po zhvillohet sot në Ohër, kushtuar çështjeve më aktuale në fushën e emigracionit.

Megjithëse, sipas Spasovskit, pavarësisht nga tendenca të tilla, situata e sigurisë në kufijtë shtetërorë në përgjithësi është e favorshme, ai theksoi se janë ndërmarrë një numër masash dhe aktivitetesh për të ruajtur një situatë të tillë, por edhe për të trajtuar në mënyrë adekuate fluksin eventual të ardhshëm masiv, si dhe është zgjatur vendimi për shpalljen e situatës së krizës në territorin e kufijve shtetërorë jugorë dhe veriorë, e cila mundëson përdorimin e pandërprerë të burimeve dhe kapaciteteve të nevojshme kombëtare për t’u marrë me sfidën.

Ministri Spasovski, ndër të tjera, vuri në dukje edhe statusin e Marrëveshjes mes BE-së dhe Republikës së Maqedonisë Veriore me të cilën Agjencia Evropiane për Kufirin dhe roja bregdetare dhe Republika e Maqedonisë Veriore si partnerë të barabartë do të ndërmarrin veprime të përbashkëta që synojnë parandalimin e emigracionit të paligjshëm dhe krimit ndërkufitar, ligjet e reja për të huajt dhe mbrojtjen e përkohshme ndërkombëtare me të cilat harmonizohet legjislacioni kombëtar me BE-në, por në të njëjtën kohë largon disa nga boshllëqet ekzistuese dhe dobësitë e identifikuara gjatë ballafaqimit me valën e emigrantëve.(koha.mk)