Jurij Zukov, drejtuesi i përgjithshëm i Smena Komsomolsk, klub në kategorinë e dytë të Rusisë, ka deklaruar se ka mbetur pa fjalë nga sjellja e disa futbollistëve si Igor Baldin, Ibragim Bazaev dhe Nariman Gusalov të cilët akuzohen se kanë vënë bast në ndeshjen e tyre kundër Irtysh Omsk.
Sipas drejtuesit, futbollistët kanë vënë bast një shumë të konsiderueshme për humbjen e skuadrës së tyre, duke fituar një “mal” me para.
Ndeshja u mbyll 0-1 për miqtë me penalltinë e shënuar në minutën e 18-të, pavarësisht se luajtën me një futbollist më pak që nga minuta e 30-të, kur njëri prej futbollistëve të Irtysh u ndëshkua me kartonin e kuq.
“Na vjen shumë keq për atë që ndodhi. Është një tronditje për klubin tonë! Nuk do ta kisha pritur kurrë prej këtyre njerëzve. As që do ta kisha menduar njëherë. Si mund të vihet bast kundër skuadrës ku luan? Është diçka e paimagjinueshme!”, – deklaroi Zukov.
Ndërkohë, edhe zv.presidenti i Federatës së Futbollit në Rusi, Nikita Simonjan, ka komentuar skandalin e ndodhur në kategorinë e dytë duke pranuar se kjo situatë do të kushtëzojë reputacionin e futbollit rus.
“Një situatë e tillë do të ndikojë negativisht te imazhi i futbollit rus. Akuzat janë vërtetuar dhe tani do të merren masa sepse këto persona nuk kanë të bëjnë me futbollin rus”, deklaroi Simonjan.
Ndërkohë, pas kësaj është vendosur se ndeshja e trukuar do të riluhet, ndërsa tre futbollistë të Smena Komsomolsk janë skualifikuar për dy vjet për shitje ndeshjesh me qëllim përfitimi nga bastvënia.