“Shyqyr që shpëtuan pulat”

92

Më 22 gusht 1962, rreth orës 8 të mbrëmjes, dy vetura Citroën DS19 dolën nga Elizeu dhe u nisën për Colombey-les-deux-Églises, rezidenca private e Sharl dë Golit (Charles de Gaulles). Në vendin e quajtur Petit-Clamart, tre njerëz të armatosur sulmuan me armë veturën e Presidentit. Vetëm 8 nga 150 plumbat e qitur arritën të kapnin pjesën e pasme të automjetit. Dë Goli dhe gruaja e tij Ivonë (Yvonne de Gaulle) i shpëtuan paq atentatit. Duke dalë nga vetura, zonja e Presidentit pyeti e shqetësuar:

– Besoj se pulat nuk i gjeti gjë?

Policët e truprojës, që kujtuan se e kish fjalën për vete dhe bashkëshortin, u çuditën fort nga kjo mënyrë bisedimi kaq familjare e Zonjës së Parë. Por, mandej morën vesh se ishte fjala për pulat që kish marrë me vete për drekën e së nesërmes dhe i pati futur në bagazhin e autoveturës.

Kurse Sharli, që i pati shpëtuar edhe një atentati të partizanëve në Algjerinë franceze, bëri vetëm këtë koment të shkurtër: “Kësaj here, plumbat më shkuan tangent”.