Shtim negativ natyror, lindën 5141 dhe vdiqën 5419 persona, 23 janë foshnja

43

Shkup, 30 nëntor – Shtimi natyror në vend në tremujorin e tretë të vitit është negativ.  Të dhënat e Entit Shtetëror për Statistikë tregojnë se numri i të sapolindurve në tremujorin e tretë të vitit 2020, në krahasim me periudhën e njëjtë të vitit të kaluar, është ulur për 5,2 për qind dhe është 5.141 fëmijë të lindur të gjallë, ndërsa numri i personave të vdekur shënon rritje prej 15,3 për qind në krahasim me tremujorin e njëjtë të vitit 2019 dhe është 5.419 persona, ndërsa prej tyre 23 të vdekur janë foshnja.

Shtimi natyror është negativ, -278 persona, që do të thotë se për aq persona numri i fëmijëve të lindur gjallë është më i vogël se numri i personave të vdekur.

Numri i martesave të lidhura në këtë tremujor të vitit është zvogëluar për 12,9 për qind në krahasim me periudhën e njëjtë të vitit 2019 dhe është 3.768 martesa, ndërsa numër i rritur është regjistruar tek martesat e shkurorëzuara për 8,5 për qind, gjegjësisht në këtë tremujor janë marrë 357 raporte për martesa të shkurorëzuara.