Shkup, 6 qershor – Një sërë studimesh thonë se, ndotja e ajrit luan një rol vendimtar në përhapjen e pandemisë së shkaktuar nga virusi Sars-cov-2. Në një raport të publikuar së fundmi për ndikimin e covid-19 në ndotjen e ajrit në Ballkanin Perëndimor, Banka Botërore nënvizon pikërisht këtë, duke theksuar se me ardhjen e dimrit dhe me shtimin e ndotjes gjatë sezonit më të ftohtë të vitit mund të shohim edhe shpërthime të fuqishme të pandemisë në Ballkanin Perëndimor.
Situata mund të përkeqësohet nga fakti se, thellimi i varfërisë në familjet më të varfra do të nxisë ata që të zëvendësojnë karburantet me cilësi të lartë me lëndë djegëse të lira, ç’ka do të përkeqësonte ndjeshëm nivelin e ndotjes së ajrit. “Vendet me nivele të larta të ndotjes së ajrit duhet të zbatojnë rregullore dhe të marrin masa që përmirësojnë cilësinë e ajrit për të zvogëluar ekspozimin e njerëzve në dimrin e ardhshëm”, thotë Banka Botërore në raport. Por si është Maqedonia krahasuar me vendet e tjera të rajonit sa i përket ndotjes së ajrit?
Shkupi rezulton të jetë qyteti me ndotjen më të lartë të ajrit në rajon, krahasuar me kryeqytetet e tjera, si Podgorica, Sarajeva, Tirana apo Beogradi, ndërkohë që Prishtina nuk merret në analizë. Ndotja e ajrit në rastin konkret matet nga niveli i grimcave PM2.5, që janë kryesisht produkt i fabrikave, ndotjes nga makinat apo djegies së drurit. Por, pavarësisht se ka pozitat më të këqija në rajon, Shkupi ka një normë të këtyre grimcave ndjeshëm më të larta se vlera e rekomanduar nga OBSH, poshtë nivelit kufi të Bashkimit Evropian. Por, Shkupi rezulton të ketë një ndotje të ajrit më të lartë se thuajse të gjitha kryeqytetet e Evropës Perëndimorë, si Roma, Madridi, Berlini, Parisi, Amsterdami, Athina etj, etj.