Sa u mbajtën sekrete aktakuzat për ish-luftëtarët e UÇK’së?

52

Akoma nuk dihet nëse akti akuzues që përfshinë Presidentin Hashim Thaçi, kreun e Partisë Demokratike të Kosovës, Kadri Veseli dhe disa të tjerë, është konfirmuar apo është hedhur poshtë nga gjyqtari i procedurës paraprake.

Duket se Dhomat e Specializuara nuk e kanë të vështirë të mbajnë sekret fatin e aktakuzave, madje edhe për një kohë më të gjatë.

Kjo u vërtetua më 24 shtator të këtij viti kur Sali Mustafa, i njohur si komandant Cali u arrestua befasisht nën asistimin e EULEX’it, kur u morr vesh se urdhri për këtë aksion ishte lëshuar 103 ditë më herët, më 12 qershor kur edhe iu konfirmua aktakuza.

Kaq shumë jo, por goxha ditë kishin kaluar nga ngritja e aktakuzës deri te arrestimi i Fatmir Limajt nga Tribunalin Ndërkombëtar për Krime Lufte në ish Jugosllavi.

Limaj ishte akuzuar për krime lufte më 24 janar të 2003-ës, ndërsa ish luftëtari i UÇK’së ishte arrestuar tre javë e pesë ditë më vonë, në 19 shkurtin e 2003-ës, sa ishte në Slloveni.

Ngjashëm ishte vepruar edhe me Haradin Balën që ishte pjesë e së njëjtës aktakuzë me Limajn, të ngritur në 24 janarin e 2003.

Megjithëse ky bashkë me Isak Musliun e Agim Murtezin ishin transferuar për në Tribunal një ditë më herët se arrestimi i Limajt, më 18 shkurt.

Më shkurt se këta para trupit gjykues priti për të dalë ish komandanti i zonës së Dukagjinit, Ramush Haradinaj.

Aktakuza e tij u konfirmua më 4 mars të 2005-ës, e njëjta ishte publikuar 6 ditë më vonë deri sa vetë Haradinaj pati paraqitjen e parë në Hagë më 14 mars të atij viti.

Tribunali i Hagës kishte vepruar kësisoj edhe me ish luftëtarët në luftëra tjera të Ballkanit.

Ish gjenerali i ushtrisë kroate, i lindur në Vushtrri, Rrahim Ademi pati aktakuzë të ngritur ndaj tij që nga 21 maji i vitit 2001 ndërkohë që ky u vetë-dorëzua në Tribunal më 25 korrik./KlanKosova