Kryetarja e Tetovës, Teuta Arifi, herën e fundit ishte shprehur se ndërtimi e deponisë do të zgjidhte një problem që me dekada ka regjioni i Pollogut me deponitë e egra. Ajo kishte deklaruar se punimet në deponinë Rusino do të zhvillohen në dy faza, megjithëse ka 65 ditë që kanë kaluar nga afati për fillimin e punëve
Urim HASIPI
Tetovë, 1 dhjetor – Kanë kaluar 65 ditë që kur për herë të fundit ishte premtuar se deponia Rusino në Gostivar do të fillojë të rregullohet. Por edhe sot e kësaj dite, në terren pothuajse nuk është bërë asgjë krahas premtimeve të deritanishme. Ka qenë 24 shtatori i këtij viti kur kryetarët e komunave të Pollogut caktuan fazat për fillimin e punëve në këtë deponi rajonale, megjithatë ende nuk ka asgjë informatë kthyese se kur do të fillojë të realizohet faza e parë, shkruan gazeta KOHA.
Kryetari i Komunës së Gostivarit, Arben Taravari, është shprehur se pas 15 vitesh të ekzistimit të këtij problemi, tashmë seriozisht është duke u punuar në këtë drejtim, por pa precizuar detaje se kur do të fillohet me punë konkrete. “Ky problem është gati se mbi 15 vjet. Gati se 5 vite banorët lokal në ato pjesë, kërkojnë që të ndërmerren hapa konkret nga ana e kryetarëve të komunave. Nuk është ndërmarrë asgjë. Tashmë kanë filluar aksionet për të bërë diçka në aspektin infrastrukturor dhe për rregullimin e deponisë Rusino”, deklaroi Taravari.
Sipas informacioneve, deri më tash në deponinë Rusino nga ana e Komunës së Gostivarit është bërë një investim, ndërsa Taravari sqaron për KOHA se shumë shpejt do të dilet në vendngjarje për të parë punët e deritanishme.
“Planifikojmë të shkojmë shumë shpejt në vendngjarje dhe të shohim se çfarë pune ka bërë Komuna e Gostivarit. Po ashtu, së bashku me komunat e rajonit planor të Pollogut jemi duke punuar për hapjen e tenderëve të caktuar për të përmirësuar ambientin në deponinë Rusino”, deklaroi Taravari. Kryetarja e Komunës së Tetovës, Teuta Arifi, herën e fundit ishte shprehur se ndërtimi e deponisë do të zgjidhte një problem që me dekada ka regjioni i Pollogut me deponitë e egra. Ajo kishte deklaruar se punimet në deponinë Rusino do të zhvillohen në dy faza.
“Projekti ka dy faza, faza e parë nënkupton studimin e fizibilitetit për sa i përket trajtimit të mbetjeve dhe masave afatshkurta, veçanërisht linjat e drenazhet që dalin nga ujërave të zeza që dalin nga deponia dhe ju shkaktojnë dëme qytetarëve. Ky projekt kap vlerën e 7.8 milionë franga zvicerane e që do jetë në shërbim të të gjithë nëntë komunave të Pollogut”, pati thënë Arifi. Por, edhe krahas këtyre premtimeve të njëpasnjëshme, deponia Rusino mbetet në gjendjen e mëparshme dhe kësisoj duke mos plotësuar kushtet elementare për të qenë deponi rajonale. Në fillim të muajit tetor, përfaqësues të Zyrës për Zhvillim ekonomik lokal pranë Komunës së Gostivarit dhe Ndërmarrjes Publike “Komunalec” të Gostivarit realizuan një takim me ekspertët e Sekretariatit Zviceran për Çështje Ekonomike SECO dhe me përfaqësues të Qendrës për Zhvillim të Rajonit Planor të Pollogut. Në takim, ekspertët e SECO-s u njoftuan me gatishmërinë e Komunës së Gostivarit për fillimin e zbatimit të masave urgjente për rehabilitimin e deponisë Rusino, e që nënkupton kanalizimin e ujërave të zeza, fillimin e studimit të fizibilitetit për hapjen e rrugës alternative drejt deponisë Rusino – rruga përmes Krastës së Reçanit për të shmangur kalimin e automjeteve të rënda nëpër vende të banuara, si dhe të masave tjera të nevojshme në këtë drejtim. Përndryshe, krahas mjeteve të Qeverisë së Zvicrës në vlerë prej 7 milionë euro, për këtë deponi respektivisht për rregullimin e rrugës janë ndarë 25 milionë denarë nga ana e Byrosë për Zhvillim Rural. (koha.mk)