Reagon BESA: Gjykata e vrau sërish Almirin

Shkup, 5 prill – Gjykata duke dashur që të vendosë drejtësi, për herë të dytë e vrau Almirin e vogël duke i dhënë dënimin minimal vrasësit Boban Iliq, por edhe më e keqja duke i dënuar edhe familjarët e Almirit të vogël. Kështu thuhet në reagimin e Lëvizjes BESA, sipas të cilës, që nga rikualifikimi i lëndës e deri në këtë gjykim skandaloz – dëshmon se gjyqësia në Maqedoni është ende e kapur, selektive dhe joprofesionale.

“Rikujtojmë opinionin publik kur i riu Naser Eshtrefi vrau në vetëmbrojtje moshatarin e tij maqedonas e përkundër faktit që mosha e tij e mitur duheshte të respektohen nga gjykata, përsëri u dënua me 14 vjet burg ndërsa vrasësi i Almirit që opinion publik e ka parë edhe përmes video-incizimeve merr dënim lehtësues që në shtete normale evropiane me demokraci të zhvilluar dhe gjyqësor profesional do ishte dënuar me burg të përjetshëm. Kërkojmë nga Prokurori Publik në Maqedoni Lubomir Joveski që për shkaqe morale të japë dorëheqje nga posti i tij ndërsa nga këshilli gjyqësor republikan kërkojmë që të merr masë ndaj gjykatësit i cili solli këtë vendim skandaloz”, thuhet në reagimin e BESËS.

Në NATO dhe BE me këtë gjyqësor, thuhet më tej në reagim, vështirë se mund të pretendohet integrimi. “Sundimi i së drejtës ishte një nga segmentet e theksuara në të gjitha raportet nga BE dhe NATO dhe për këtë qeveria duhet ti qaset reformave rrënjësore si punë të menjëhershme, për mos na u përsëritur raste të montuara dhe verdikte të padrejta si në rastin e Almirit”. (koha.mk)