Pendarovski: Greqia premtoi se nuk do të bllokohet në NATO dhe në BE

30

Shkup, 26 qershor  – Kriteri për hyrjen e Maqedonisë në NATO nga viti 2008 deri më sot është zgjidhja e kontestit me Greqinë. Tani duhet të orientohemi drejt çfarë do të thotë Greqia në letrën e saj dërguar Aleancës, sesa në formulimet të cilat i përdor sekretari i përgjithshëm i NATO-s.

Këtë sot e deklaroi koordinatori i përgjithshëm për NATO-n, Stevo Pendarovski duke e komentuar deklaratën e Jens Stoltenberg se referendumi i pasuksesshëm eventual do ta rrezikonte anëtarësimin e Maqedonisë në NATO, në debatin “Aspektet pozitive dhe negative nga anëtarësimi i Maqedonisë në NATO” në Institutin për strategji dhe zhvillim.

“Pritet letra prej vendit të vetëm anëtar që deri më tani bënte probleme për anëtarësimin tonë në Aleancë. Duhet t’i shohim formulimet brenda. Premtimet e Ministrisë së Punëve të Jashtme greke janë se do të jetë i pastër dhe i qartë rekomandimi për dy organizatat, jo vetëm për NATO-n, se për në NATO Greqia nuk do të bëjë problem të marrim ftesë, ndërsa për në BE nuk do të bëjë problem të fillojmë me negociatat”, tha Pendarovski.

Sipas tij, vetëm anëtarësimi në NATO mbështetet prej të gjitha bashkësive etnike dhe kjo e paraqet faktorin më të fuqishëm koheziv në shoqëri.

“Kur Maqedonia të hyjë në NATO, definitivisht do të mbyllet çështja nëse do t’ia dalë Maqedonia. Jo në kuptimin nëse NATO do të ndalet në kufijtë tanë dhe do të na mbrojë prej sulmeve, nuk do të kemi sulme territoriale ndaj Maqedonisë. NATO është organizatë në të cilën anëtare janë shtetet më të fuqishme dhe këmbehen informacione brenda dhe me shfaqje të përbashkët shkohet kundër këtyre kanosjeve të reja”, vlerësoi Pendarovski.

Lidhur me referendumin e ardhshëm në të cilin qytetarët do të prononcohen për marrëveshjen me Greqinë dhe nëse do të ndryshojë censusi, ai vlerëson se “nuk është mirë të ndryshojnë rregullat zgjedhore në sy të vetë ngjarjes”.

Lidhur me anëtarësimin në BE, Pendarovski i vlerësoi si “absolutisht të pasakta” spekulimet se BE-ja do të japë rekomandim të kushtëzuar për fillimin e negociatave, në këmbim të asaj që vendi të hapë kampe refugjatësh në territorin e saj.

Sipas tij, BE-ja akoma nuk ka përcaktuar politikë të përbashkët për këtë çështje.

Comments are closed.