Zëvendëskryeministri i Turqisë, Hakan Çavushoglu tha se presidenti i këtij vendi Recep Tayyip Erdogan do të jetë presidenti i parë turk i cili do të vizitojë Greqinë pas 65 vitesh. Duke folur për vizitën e cila do të realizohet gjatë ditëve në vijim, Çavushoglu tha se “Kemi tre projekte konkrete. Njëri prej tyre është ekspedita e trageteve për transportin e njerëzve dhe mallrave nga Izmiri në Selanik. Projekti i dytë ndërtimi i linjës së trenit të shpejtë nga Stambolli për në Selanik dhe i treti ndërtimi i urës në portat doganore Kipi dhe Ipsala”. Çavushoglu tha se vizita e presidentit Erdogan në Greqi do të ngritë marrëdhëniet ndërmjet këtyre dy vendeve në një nivel më të mirë. Ai bëri të ditur se në fillim të këtij muaji edhe ai vetë ka vizituar Komotinin, që është vendlindja e tij. Çavushoglu tha se në kuadër të vizitës së tij ka zhvilluar kontakte në Athinë dhe në Thrakinë Perëndimore. Lidhur me vizitën të cilën presidenti Erdogan do të realizojë në Greqi, Çavushoglu tha se presidenti Erdogan do ta vizitojë Greqinë si një president i Republikës së Turqisë për herë të parë pas 65 vitesh. “Mendoj se kjo vizitë do të ketë rezultate shumë të rëndësishme. Gjatë vizitës sime në rajonin e Thrakisë Perëndimore, ne u pritëm me një dashamirësi të madhe nga bashkatdhetarët tanë në Komotini dhe Ksanthi. Kjo është sigurisht një emocion që buron nga prania e presidentit tonë, i cili gjithmonë mendon për ata dhe zemra e të cilit rrah për ta. Ky është një emocion i cili buron nga ajo që shohin se një Turqi 80 milionëshe është pranë tyre”.