Një udhëzues i publikuar së fundi në Zvicër ka për qëllim që t’i informojë pilotët e dronëve rreth mundësive për ta shmangur shqetësimin apo situatat stresuese për kafshët dhe zogjtë. Me rritjen e përdorimit të dronëve në zona që deri më tani kanë qenë të qeta, grupet e dronëve janë duke u paralajmëruar rreth ndikimit të mundshëm të këtyre pajisjeve në botën e egër, raportojnë mediat zvicerane. Sipas një studimi kafshët dhe zogjtë mund t’i perceptojnë dronët si rrezik. Rritja e stresit te kafshët mund të ndikojë në mbijetesën e kafshëve si dhe riprodhimin e tyre. Dronët nuk sugjerohet që të fluturojnë drejt kafshëve apo zogjve, apo t’i përndjekin ata.