Osmani-Çaushogllu: Maqedonia e Veriut dhe Turqia mbeten partner strategjik

Shkup, 17 korrik – Zëvendëskryetari i Qeverisë për Çështje Evropiane Bujar Osmani, sot mbajti takim me Ministrin e Punëve të Jashtme të Republikës së Turqisë, Mevlut Çaushogllu në kuadër të vizitës së tij në Maqedoninë e Veriut, ku u bisedua për partneritetin afatgjatë strategjik midis dy vendeve dhe anëtarësimit në NATO.

Osmani, siç informojnë nga kabineti i tij, theksoi se Turqia dëshmoi mbështetjen shumëvjeçare të vendit tonë në rrugën e saj drejt integrimit evropian dhe euro- atlantik.

“Marrëdhëniet miqësore tradicionale të afërta mes dy vendeve janë shembull i vërtetë për ndërtimin e partneritetit strategjik, dhe në këtë kuptim, me kënaqësi mund të them se me ratifikimin e Protokollit për anëtarësimin e Maqedonisë së Veriut në NATO nga ana e Kuvendit të Madh Popullor, Turqia dëshmoi mbështetjen shumëvjeçare të vendit tonë në rrugën e saj drejt integrimit evropian dhe euro- atlantik” , theksoi Osmani.

Në vazhdim të takimit dy bashkëbiseduesit diskutuan për bashkëpunimin bilateral dhe mundësitë për thellimin e saj në të ardhmen, në kuadër të partneritetit strategjik afatgjatë, si dhe u hapën temat lidhur me integrimin evropian dhe perspektivat e vendit gjatë periudhës së ardhshme, në pritje të fillimit të negociatave në tetor.

Osmani dhe Çaushogllu këmbyen mendime edhe për gjendjet në rajon, duke theksuar se suksesi në tejkalimin e çështjeve të hapura të Maqedonisë së Veriut me fqinjët është shembull i shkëlqyer i Ballkanit që duhet të jetë motivim dhe shtytje për të gjitha vendet tjera të Ballkanit.