Opozita në Shqipëri kërkon qeveri transitore pa Ramën kryeministër

Tiranë, 16 janar -Kryetari i Partisë Demokratike, Lulzim Basha i ftuar në “Tempora” në Ora News kërkoi qeveri transitore pa kryeministrin Edi Rama në krye.

“Fakti që kemi sot një situatë të paralajmëruar nga ne, legjitimon avancimin me një zgjidhje që kësaj radhe nuk do të jetë kurban i paqartësisë që ekzistonte dje tek komuniteti ndërkombëtar. Me këtë njeri, Shqipëria është zhytur më shumë në krim. Pyetja bazë që ata i përgjigjen negativisht; Me këtë qeverisje kemi më shumë apo më pak eksport kriminal drejt vendeve të tjera. Më pak apo më shumë emigrantë të paligjshëm? Përgjigja është më shumë krim nga Shqipëria, më shumë emigracion. Edi Rama ka zgjedhur që vendi të mos qeveriset sipas rregullave evropiane”, ka thënë Basha.

Qeveri transitore do të thotë një qeverisje që të përgatis kushtet për zgjedhjet që nuk do të jenë peng i krimit dhe parave të drogës, ku qytetarët do të krijojnë atë hapësirë…duke rifituar Parlamentin. Këtë nuk mund ta bëj një kryeministër, ekzistenca politike e të cilit ka zgjedhur për të mbijetuar për interesa të një grushti oligarkësh dhe kriminelësh.

Zgjidhja politike është ajo për t’ju rikthyer sovranit, për të legjitimuar një parlament. Pra, largimi i këtij kryeministri, një qeveri transitore që përgatit reformat kyçe dhe zgjedhje të lira dhe të ndershme si dhe i jep shanse Shqipërisë për të hapur negociatat me BE dhe më pas shkuarja në zgjedhje të parakohshme.