“Ne nuk u shërbejmë zezakëve”, ka thënë shefja e restorantit “Trauben” në Bazenheid të Kantonit St. Gallen, në momentin kur aty hynte një grup i përbërë nga azilkërkues dhe nga Jonas Brunschwiler, siç e thotë ky i fundit për mediat zvicerane. Kjo ka ndodhur më 23 qershor 2017, kur Brunschwiler ishte duke kryer shërbimin e tij civil në kuadër të ushtrisë dhe kishte marrë për detyrë që ma ndihmën e azilkërkuesve të shkatërronte bimët invazive në zonën e afërt. Ai donte të pinte një birrë në fund të ditës së punës, me grupin përbëhej kryesisht nga refugjatë etiopianë. Por, nuk ishte e thënë të pinte birrën, shkruan tagblatt.ch. Brunschwiler, që është student i anglishtes dhe filozofisë as sot nuk arrin të kuptojë: “Sjellja e shefes së trestorantit ishte nga çdo aspekt absurde. Përveç anës njerëzore, thotë ai, këtu bëhet fjalë edhe për anën ekonomike, pasi që ne sigurisht do të paguanim për shërbimin. Përvojë të ngjashme me këtë restorant kishte pasur një muaj më vonë edhe Partia Socialdemokrate e regjionit. Ky seksion, mbledhjet i kishte mbajtur zakonisht në restorantin në fjalë, ndërsa kësaj radhe përgjigja e pronarëve kishte qenë refuzuese. Me arsyetimin se nuk pranojnë manifestime politike, por SP- e Bazenheidit është e bindur se synimi është diskriminues, i ngjashëm me atë që kishin treguar ndaj refugjatëve afrikanë. E pyetur nga mediat regjionale, policia ka pohuar se është informuar rreth ngjarjes dhe pasi të marrë konfirmimin e plotë, do ta bartë çështjen në prokurorinë përkatëse, e cila do të nisë hetimet. Ndërsa pronarëve të etiketuar të restorantit, “nuk u kujtohet” të ketë ndodhur diçka e tillë.