Menduh Thaçi takoi ambasadorin Timonie

Tetovë, 13 prill– Kryetari i Partisë Demokratike Shqiptare Menduh Thaçi sot në selinë e partisë ka pritur ambasadorin e Francës, Kristian Timonie.

Siç informojnë nga Shërbimi për informim i partisë, në takim është biseduar për çështjet aktuale politike, kontestin me Greqinë, si dhe për ecurinë e reformave që Maqedonia duhet t’i përmbush drejt proceseve integruese.

Kryetari Thaçi ka theksuar rëndësinë e zgjidhjes së kontestit të emrit që do të mundësonte anëtarësimin e Maqedonisë në NATO, si dhe të procesit të reformave, duke potencuar se procesi Euro-Atlantik është prioritet absolut për Partinë Demokratike Shqiptare dhe për shqiptarët e Maqedonisë.

Bashkëbiseduesit janë pajtuar që duhet të jepet kontribut maksimal për integrimin e vendit në strukturat euro-atlantike, dhe se në këtë drejtim rikthimi i dialogut të mirëfilltë politik është me rëndësi të veçantë, ku të gjitha palët duhet të mbajnë pjesën e tyre të përgjegjësisë dhe të ndihmojnë lëvizjen e proceseve përpara drejt integrimit në NATO dhe BE.