Këtë vit në Spanjë kanë hyrë më shumë se 21 mijë emigrantë nga Afrika, shumë më tepër se sa në Itali apo Greqi. Organizata botërore e migracionit, IOM, thotë se Spanja është kthyer në objektivin kryesor të emigrantëve
Këtë vit në Spanjë kanë hyrë më shumë se 21 mijë emigrantë nga Afrika, shumë më tepër se sa në Itali apo Greqi. Organizata botërore e migracionit, IOM, thotë se Spanja është kthyer në objektivin kryesor të emigrantëve ilegalë. Ditët e fundit (të premten dhe të shtunën e kaluar), spanjollët në ndihmë të emigrantëve ndihmuan më shumë se 12.000 afrikanë që erdhën me varka. Siç raporton Oliver Neuroth, Qeveria e Madridit e ka bërë të qartë se autoritetet vendore nuk janë të përgatitur për këtë ardhje refugjatësh. Një gomone me 30 emigrantë afrikanë i afrohet bregut. Brenda disa sekondave njerëzit zbresin nga varka në tokë dhe zhduken në brezin me rërë. Pushuesit në breg shohin të çuditur. Skena është duke u përsëritur prej disa ditësh në bregdetin jugor spanjoll. Rreth 700 emigrantë zbresin çdo ditë në tokë. Në pjesën më të madhe të rasteve anijet spanjolle të shpëtimit i ndalojnë varkat disa kilometra larg bregdetit dhe i marrin refugjatët në anijen e tyre.
Në bregun andaluzian ndihmësit e Kryqit të Kuq dhe të autoriteteve vendore kujdesen për njerëzit. Nga qeveria në qendër thuhet se situata ndodhet nën kontroll, prandaj duhen investuar 30 milionë euro për ndihmën e menjëhershme ndaj refugjatëve. Ministri i Jashtëm, Josep Borrell: “Nëse emigrantët do të vazhdojnë të vijnë kaq shumë si tani, atëherë qendrat tona të pranimit do të mbushen shpejt. Por ne i fusim njerëzit edhe në salla sporti, ato nuk janë burgje. Sistemi ynë sigurisht që nuk është perfekt, s’ka dyshim, dhe neve na nevojiten më shumë kapacitete. Por ne bëjmë pjesë tek vendet që i trajtojnë mirë emigrantët”. Kështu thotë politikani për çështjet evropiane, Borrell, duke patur parasysh qeverinë e djathtë italiane, e cila e ka mbyllur vendin për emigrantët. Këtë gjë e kritikon edhe ministri i Brendshëm spanjoll, Fernando Grande-Marlaska. Gjatë vizitës së tij në Andaluzi, ai bëri të qartë se Spanja nuk është e gatshme të kujdeset e vetme për ardhjet e refugjatëve. “Migracioni është një problem që ka të bëjë me gjithë Evropën. Prandaj neve na duhet një zgjidhje evropiane”.
Por ç’ lloj zgjidhje duhet të jetë kjo konkretisht, nuk dihet as nga qeveria spanjolle Për ministrin Borrell është e qartë se: “Zgjidhja e krizës së refugjatëve është shumë më e vështirë se sa zgjidhja e krizës së euros. Problemi i migracionit është problem strukturor, problem emocional. Kriza e euros arriti të zgjidhej me para dhe reformimin e institucioneve”.
Shumë qeveri të mëparshme spanjolle dhe Bashkimi Evropian janë munduar prej vitesh ta zgjidhin edhe problemin e migracionit po ashtu me para. Kështu çdo vit BE i paguan Marokut shuma milionash, si shpërblim që autoritetet e atjeshme të bllokojnë emigrantët afrikanë që kanë marrë rrugën për në Evropë. Një sistem që ka funksionuar mirë vitet e mëparshme. Përfaqësuesja e qeverisë spanjolle në ekslavën Ceuta, Salvadora Mateos, mendon se Maroku kërkon t’i jepen më shumë para prandaj ka lejuar ditët e fundit kaq shumë emigrantë që të vazhdojnë rrugën. Vetëm ditën e enjte 600 vetë erdhën në Ceuta. “Qeveria spanjolle kërkon të ushtrojë më shumë presion mbi Bashkimin Evropian, në mënyrë që Maroku të marrë më shumë mjete financiare për të ndaluar emigrantët”. Sepse sipas vlerësimeve, aktualisht rreth 50 mijë refugjatë afrikanë janë duke pritur për të hyrë në Spanjë, e kështu në Bashkimin Evropian.