Mbledhja kuvendore për ndryshimet kushtetuese shtyhet për në orën 16

0

Shkup, 9 janar – Mbledhja kuvendore për amandamentet kushtetuese është shtyrë për në orën 16:00, njoftoi kryetari i Kuvendit, Talat Xhaferi. Ai nuk e theksoi shkakun për shtyrjen e mbledhjes.

Deputetët në mbledhjen e sotme të 75-të do t’i konfirmojnë propozim – amandamentet XXXIII, XXXIV, XXXV dhe XXXVI të Kushtetutës së Republikës së Maqedonisë, pas çka pason miratimi i tyre e më pas shpallja.

Para fillimit të mbledhjes kuvendore, sekretari i përgjithshëm i LSDM-së dhe deputet, Aleksandar Kiracovski në konferencë për shtyp informoi se është siguruar mbështetja prej minimum 80 deputetëve për miratimin e ndryshimeve kushtetuese.

Ndërkohë, para Kuvendit të Republikës së Maqedonisë filloi edhe protesta e paralajmëruar në organizim të shoqatave “Tvërdokorni” dhe “Maqedonia bllokon”, kundër ndryshimeve kushtetuese.

Për shpalljen e amandamenteve nevojitet shumicë prej dy të tretave, përkatësisht për to të votojnë 80 nga gjithsejt 120 deputetët e Kuvendit. Pas shpalljes së amandamenteve, deputetët duhet ta votojnë edhe ligjin kushtetues për zbatimin e tyre.

Këto amandamente do të jenë pjesë përbërëse e Kushtetutës së Republikës së Maqedonisë dhe do të hyjnë në fuqi me hyrjen në fuqi të Marrëveshjes përfundimtare për zgjidhje të dallimeve të përshkruara në rezolutat 817 (1993) dhe 845 (1993) të Këshillit të Sigurimit të Kombeve të Bashkuara, për ndërprerjen e validitetit të Marrëveshjes së përkohshme të vitit 1995 dhe për vendosjen e partneritetit strategjik mes palëve dhe reatifikimin e Protokollit për inkuadrim në NATO nga Faqja e parë e Marrëveshjes përfundimtare.

Comments are closed.