Qefser ABDYLI
Shkup, 2 maj – Vitin e kaluar 8.410 qytetarë janë ankuar deri te Agjencioni për komunikime elektronike (AKE) për pengesa në rrjetin celular dhe fiks, internet si dhe televizion. Qytetarët më shumë janë ankuar për faturat e larta për telefonin celular dhe internetin, ndërprerje të sinjalit, shërbim jocilësor dhe jo në kohë si dhe tarifa të larta për roaming, shkruan gazeta KOHA. Sipas të dhënave të AKE-së, nga numri i përgjithshëm i ankesave, për 982 ankesa është iniciuar procedurë për pengesat, ndërsa më shumë se 85 për qind nga pengesat janë mbyllur. Nga të gjithë thirrjet që kanë arritur në numrin e telefonit 190 në kontakt qendrën e AKE-së, pothuajse 20 për qind janë për probleme me shërbime në telefonin celular, ndërsa në vendin e dytë janë ngecjet për shërbimet e internetit në telefonat celularë me 18 për qind. Në shërbimet për roaming në telefonin celular bëjnë pjesë vetëm 5,5 për qind e pengesave. Siç thonë nga AKE, kjo është rezultat i aktiviteteve të cilat janë ndërmarrë vitet e kaluara dhe për shkak se ka qytetarë të cilët udhëtojnë jashtë vendit, megjithëse numri i ankesave për roaming është ulur për 39 për qind në vitin 2016 në krahasim me vitin 2015. “Në vitin 2015 AKE i angazhoi operatorët t’i lajmërojnë konsumatorët me SMS për tejkalimin e 1.000 denarëve në data-roaming dhe 3.000 denarë për biseda, me çka janë të njoftuar më kohë për fatura eventualisht më të larta në roaming apo të tejkalimit të kësaj si rezultat i pakujdesisë së konsumatorëve”, thotë Sasho Dimitrijoski, drejtor i AKE-së. Në numrin 190, i cili është në funksion nga maji i vitit 2010, të gjithë shfrytëzuesit e shërbimeve të operatorëve të telekomunikacionit mund të paraqesin probleme eventuale në rrjetin celularë dhe fiks, internetin në celularë dhe fiks si dhe televizionin kabllovik, gjegjësisht qytetarët të ankohen nëse kanë pengesa me operatorët rreth shërbimeve të cilët i shfrytëzojnë.
“Mund të konstatojmë se mbulimi me sinjal dhe cilësia është fushë e cila edhe më tej duhet të përmirësohet, që konsumatorët të fitojnë shërbim prej të cilit vërtetë do të jenë të kënaqur. Kërkesat për shërbime cilësore për internet celularë tregojnë se qytetarët e Maqedonisë edhe më shumë shfrytëzojnë internet jo vetëm në komunikim të zakonshëm, por edhe në biznes”, thotë drejtori i AKE-së.
Thirrjet në numrin 190 janë falas dhe thirrja mund të realizohet në çdo kohë të ditës, sepse kontakt qendra punon 24 orë. Në periudhën prej orës 8:00 e deri në ora 17.00 çdo ditë pune, konsumatorëve ju shërben një operatorë, ndërsa në periudhën e mbetur të ditës, në ditë pune dhe fundjavë, konsumatorët mund të lënë porosi për problemin e tyre, për të cilin operatorët përgjigjen në afat sa më të shkurtër. Konsumatori së pari drejtohet për të bërë ankesë deri te operatori dhe më pas edhe te AKE në afatin e paraparë. Afati për dorëzimin e ankesës me shkrim deri te operatori është 15 ditë nga paraqitja e pengesës. Operatori është i obliguar konsumatorit t’i përgjigjet më shkrim për ankesat e dorëzuara në afat prej 15 ditëve nga dita e pranimit të ankesës. Nëse parapaguesi nuk është i kënaqur nga vendimi i sjellë pas ankesave, ka të drejtë në afat prej 15 ditëve nga dita e pranimit të së njëjtës të dorëzojë kërkesë deri te AKE për zgjidhje të problemit. Gjithashtu, nëse operatori nuk vepron sipas ankesës së dorëzuar në atë afat, konsumatori ka të drejtë deri të Agjencia të dorëzojë kërkesë për zgjedhje të problemit në afat prej 35 ditëve nga dita e dorëzimit të ankesës deri te operatori.
© Gazeta KOHA. Të gjitha të drejtat janë të rezervuara