Kryeministri italian, Xhysepe Konte dha dorëheqje pasi që u thelluan mospajtimet me zëvendëskryeministrin dhe liderin e Liga-s, Mateo Salvini.
Duke iu drejtuar parlamentit, Konte tha se do t’ia dorëzonte dorëheqjen presidentit, Serxho Matarela, i cili do të duhet të vendosë nëse dëshiron të thërrasë zgjedhje të parakohshme, ose të përpiqet të krijojë një koalicion të ri.
Vendimi për të dhënë dorëheqje vjen pas një sulmi të ashpër ndaj partnerit të koalicionit dhe njëherësh ministër i Brendshëm, Mateo Salvini.
Konte tha se Salvini kishte qenë “i papërgjegjshëm” pasi krijoi një krize të re politike për Italinë për “interesa personale dhe partiake”.
Salvini, udhëheqësi i partisë nacionaliste të Liga-s, kishte ngritur një mocion mosbesimi kundër Kontes.
Ai tha se nuk mund të punonte më me partnerët e tij të koalicionit nga partia Pesë Yjet.
Lideri i partisë Pesë Yjet, Luigi di Maio, ka thënë se nuk dëshiron zgjedhje të reja, duke insistuar se reforma për parlament duhet të jetë në qendër të vëmendjes.
Bazuar në sondazhe, partia e Salvinit gëzon dukshëm më shumë përkrahje, kryesisht për shkak të qasjes së tij kundër emigrantëve.
Në zgjedhjet e vitit të kaluar, Lëvizja Pesë Yjet ka fituar dy herë më shumë vota sesa Partia Liga, mirëpo sondazhet parashikojnë se gjendja tani është ndryshe.