Katari, që do ta organizojë Kupën e Botës në futboll në vitin 2022, ka konfirmuar se do të hedhë kandidaturën për t’i organizuar Lojërat Olimpike të vitit 2032. Komiteti Olimpik i shtetit arab ka deklaruar se ka nisur një fazë dialogu me Komitetin Olimpik Ndërkombëtar (IOC), për të mirëpritur evenimentin e madh olimpik. Siç dihet, Olimpiada e këtij viti (Tokio 2020) u shty për verën e ardhshme, ndërkohë që Lojërat Olimpike të vitit 2024 do të organizohen në Paris dhe ato të vitit 2028 në Los Anxhelos.
Katari ka nisur të organizojë disa evenimente madhore kohët e fundit, përfshi edhe botërorin e atletikës një vit më parë. “Ne po fitojmë nga viti në vit më shumë përvojë në organizimin e eventeve të mëdha në sport. Jemi duke hedhur bazat për organizimin e një Olimpiade”, tha sheiku Joann bin Hamad bin Khalifa al-Thani, presidenti i Komitetit Olimpik të Katarit.