Prishtinë, 6 gusht – Lideri i zgjedhur për herë të tretë i Lidhjes Demokratike të Kosovës (LDK), Isa Mustafa, ka thënë se ai nuk e ka ndërmend të jetë kandidat i kësaj partie për kryeministër dhe se partia do të zgjedhë një person që e “bën më së miri këtë punë, dhe natyrisht që ka përkrahjen e plotë të LDK-së dhe të qytetarëve.
Duke folur në një intervistë për Radion Evropa e Lirë, Mustafa ka thënë se partia që ai udhëheq, dëshiron të shkojë e vetme në zgjedhje por ky qëndrim mund të ndryshojë dhe varet se si veprojnë partitë tjera. Mustafa thotë se bisedimet me Serbinë duhet t’i udhëheqë kryeministri në pajtim me vendimin e Gjykatës Kushtetuese.
“Taksa duhet të vazhdojë derisa Serbia të mos ndërrojë qëndrimet e veta dhe përderisa mos të reflektojë në të gjitha këto sjellje të bllokadës që po i bën Kosovës”, ka thënë Mustafa.
“Tash sfida e parë janë zgjedhjet nacionale të cilat do të jenë kah fundi i muajit shtator të këtij viti, pastaj sfidë tjetër do të jetë zgjerimi dhe forcimi i mëtutjeshëm i LDK-së, do të jenë zgjedhjet lokale dhe unë mendoj se do të dalim mirë si LDK këtu, sepse jemi unikë dhe e kemi të qartë se çfarë dëshirojmë dhe se çfarë mund t’iu ofrojmë qytetarëve të Kosovës, ka thënë ai. f