Elseid Hysaj provoi një rol të ri në Islandë, duke luajtur mesfushor i djathtë në skemën 3-5-2 të Edi Rejës, detyrë të cilën në tërësi e realizoi me sukses, duke dhuruar një sërë inkursionesh interesante në atë krah.
Pasditen e sotme mbrojtësi shkodran u paraqit sërish në krah të trajnerit Edi Reja në konferencën për shtyp, pasi duket se është i përzgjedhuri i italianit për të mbajtur shiritin e kapitenit edhe për ndeshjen me Moldavinë.
Me skemën 3-5-2 luani më i avancuar. A ju krijon probleme kjo mënyrë loje?
Është një rol i ri për mua, por unë jam profesionist dhe duhet ta bëj mirë. Në fakt nuk e prisja ta bëja aq mirë sa në Islandë dhe në aspektin personal ndeshja më shkoi mirë.
A vijoni të besoni ende te kualifikimi?
Duhet të vazhdojmë të punojmë për rritjen e Kombëtares. Do ta fillojmë nga zero, për të bërë një grup, duhet të krijojmë identitet dhe të kemi kohën për më mirë.
Ndaj Moldavisë do të jeni sërish kapiteni i ekipit…
Është zgjedhje e trajnerit dhe jam i kënaqur për këtë gjë. Çdokush ka dëshirë të jetë kapiten i ekipit kombëtar, nuk është gjë e rëndësishme apo të krijojë polemika. Për mua është një ëndërr që po realizohet.
Çfarë mund të kishim bërë ndryshe, për të shmangu humbjen në Islandë?
Besoj se duhet të ishim pak më konkretë në përfundimin e aksioneve. Kishim aksionet dhe na mungoi konkretizimi.
Tifozët shqiptarë ishin edhe në Reikjavik për t’ju mbështetur. Sa të rëndësishëm janë ata për ekipin?
Janë shumë të rëndësishëm, sepse sa më shumë tifozë, aq më shumë zemër do kemi dhe të ecim përpara. Do na ndihmojnë të rritemi. Do e mendojmë me trajnerin dhe duhet të jemi shumë konkretë me realizimin e aksioneve. Duhet të nisim sa më shumë topa në zonë për sulmuesit tanë.