Gjermania dëbon dy diplomatë rusë

Gjermania dëboi dy diplomatë rusë dhe prokurorët e saj federale kanë marrë në dorë çështjen e vrasjes së një shtetasi çeçenas në Gjeorgji, ku aludohet përfshirja e Rusisë.

Ministria e Jashtme gjermane tha në një deklaratë të mërkurën se dy punonjës të ambasadës Ruse në Berlin u shpallën “persona të padëshiruar në përputhje me nenin 9 të Konventës së Vjenës për Marrëdhëniet Diplomatike.”

Zelimkhan Khangoshvili, 40 vjeç, i cili më parë kishte luftuar së bashku me separatistët në rajonin rus të Çeçenisë, u qëllua dy herë në kokë në parkun Kleiner Tiergarten më 23 gusht.

Një shtetas rus i dyshuar për vrasjen u arrestua menjëherë pas ngjarjes.

“Me këtë hap Qeveria Federale reagon ndaj faktit se autoritetet ruse, megjithë kërkesat e përsëritura në rangjet e larta dhe kërkesave këmbëngulëve nuk morën pjesë sa duhet në hetimin e vrasjes,” thuhet në deklaratë.

Ministria e Jashtme e Rusisë u përgjigj ashpër ndaj lajmit, duke thënë se dëbimet ishin “të pabaza dhe jo miqësore”. Ministria tha se Moska “do të duhet të ndërmarrë një sërë masash si përgjigje”.

Mediat gjermane dhe ndërkombëtare raportuan në fillim të kësaj jave se prokurorët do ta merrnin në dorë çështjen pasi kishin mbledhur prova se pas vrasjes qëndronte “një agjenci e huaj zbulimi”.

Shumë komentues kanë bërë krahasime midis vrasjes së Khangoshvilit dhe helmimit në vitit 2018 në Angli të ish-agjentit rus Sergei Skripal.

Rusia ka mohuar përfshirjen në ndonjërin prej incidenteve.