FSHF zyrtarizon miqësoren e tetorit, do të jetë përballja e parë në histori me Arabinë Saudite

Ka gjithmonë një herë të parë, në çdo aspekt të jetës. Natyrisht, edhe në futboll. Kjo vlen edhe për kombëtaren shqiptare, e cila do të ndeshet muajin e ardhshëm, për herë të parë në histori, me një kundërshtar krejt të veçantë. Bëhet fjalë për miqësoren ndaj Arabisë Saudite, e konfirmuar sot nga FSHF përmes faqes së saj zyrtare në internet:

“Kombëtarja shqiptare do të luajë një miqësore me Arabinë Saudite më 26 tetor 2022. Departamenti i Komunikimit në FSHF bën me dije se është arritur marrëveshja me Federatën e Futbollit të Arabisë Saudite për të luajtur një ndeshje në qytetin e Abu Dabit në Emiratet e Bashkuara Arabe.

Ndërkaq, ora dhe stadiumi ku do të luhet kjo miqësore mbeten ende për t’u përcaktuar pas diskutimeve finale mes dy federatave. Kjo do të jetë ndeshja e parë në histori mes Shqipërisë dhe Arabisë Saudite, që nuk janë përballur më parë në të kaluarën në futboll.

Advertisements

Në muajt e ardhshëm deri në fillimin e Botërorit “Katar 2022”, Shqipëria do të luajë edhe miqësore të tjera sipas kalendarit të FIFA-s, teksa FSHF po punon për të zyrtarizuar edhe rivalët e radhës.

Në muajin shtator, Kombëtarja shqiptare do të luajë dy përballjet e fundit të grupit në UEFA Nations League. Më 24 shtator kuqezinjtë përballen në transfertë me Izraelin, ndërsa më 27 shtator do të presim Islandën në stadiumin “Air Albania” të Tiranës. Më pas do të jetë radha e ndeshjeve miqësore”.