Palangan, që në gjuhën perse do të thotë leopard (po ashtu i njohur edhe me emrat Patagān, Patakān dhe Tangān), është një fshat në provincën e Kurdistanit në Iran, i vendosur në bjeshkët afër kufirit me Irakun. Në këtë fshat jetojnë 194 familje, respektivisht 821 banorë (sipas regjistrimit të vitit 2006) – dhe që të gjithë ata jetojnë në shtëpitë që e kanë bërë këtë fshat të famshëm në mbarë botën. Shtëpitë e fshatit Palangan janë ndërtuar “njëra mbi tjetrën”, respektivisht, pullazet e shtëpive të ndërtuara në nivel më të ulët shërbejnë si oborr të shtëpive të ndërtuara sipër tyre dhe kështu deri në krye të fshatit. Turistët që kanë mundësi të vizitojnë këtë pjesë të botës e kanë përshkruar këtë fshat si ndër më të bukurit që kanë parë dhe atë për shkak të arkitekturës unike dhe natyrës që e rrethon.