Paris, 23 tetor – Franca do ta vazhdojë luftën e saj kundër ekstremizmit islamik, pavarësisht kritikave nga presidenti i Turqisë, Rexhep Taip Erdogan dhe nuk do të dorëzohet në “përpjekjet e destabilizimit dhe kërcënimit”, tha sot zëdhënësi i qeverisë franceze, Gabriel Atal.
Franca “kurrë nuk do të heqë dorë nga parimet dhe vlerat e saj”, tha Atal pas një takimi të kabinetit qeveritar, duke theksuar “një unitet të fortë Evropian” kundër dhunës islamike.
Franca është tronditur këtë muaj nga prerja e kokës së një mësuesi nga një militant islamik, i cili është hakmarrë për përdorimin e karikaturave të Profetit Muhamed në një orë për lirinë e shprehjes.
Vrasja e tij shkaktoi zemërim në Francë, e cila është përballur me një valë sulmesh xhihadiste që nga masakra e janarit 2015 ndaj 12 personave në zyrat e së përjavshmes satirike Çarlie Ebdo.
Gazeta, e cila kishte nxitur zemërimin e myslimanëve, në të gjithë botën, pas botimit të karikaturave të Profetit Muhamed. Revista ribotoi karikaturat muajin e kaluar, për të shënuar hapjen e një gjykimi për bashkëpunëtorët e dyshuar në sulmin e Çarli Ebdo.
Presidenti francez, Emanuel Makron mbrojti fuqishëm traditën e shtetit laik në Francë dhe u zotua se do të godiste radikalizmin islamik, në veçanti duke mbyllur xhamitë e dyshuara për nxitjen e ideve ekstremiste.
Kjo e shtyu Erdoganin të akuzonte Makron për shënjestrimin e padrejtë të komunitetit mysliman të Francës.
Çarli Ebdo nxiti më shumë kritika nga Turqia, kur të mërkurën, në faqen e parë, botoi një karikaturë të Erdoganit, në të cilën ai paraqitej duke pirë një birrë në të brendshme, ndërsa me dorën tjetër ngriste fustanin e një gruaje të veshur me hixhab.
Turqia ka akuzuar revistën franceze Çarli Edbo, për “racizëm kulturor”.