FLORA, VAJZA QË KTHEU SËMUNDJEN NË NJË ARMË! Historia e një 21 vjeçare me fibrozë cistike 

159

Flora Gashi është vajzë e re 21-vjeçare e cila vuan nga  Fibroza Cistike, e rrallë dhe pothuajse e panjohur. Ajo rrëfen rrugëtimin e gjatë, luftën me sëmundjen dhe me veten e saj,  që nga refuzimi për t’u kuruar e deri tek iniciativat sensibilizuese për të ndihmuar veten e të tjerët, për të vetëdijesuar shoqërinë dhe shtetin për nevojën për mbështetjen që kanë të sëmurët që vuajnë nga fibroza

Arbër KADRIU

Shkup, 19 prill – Kur e kuptoi se vuan nga një sëmundje e rrallë, fibrozën cistike, Flora e kishte tepër të vështirë ta pranonte, madje refuzonte terapitë e domosdoshme për  trajtimin e sëmundjes. 21 vjeçarja nga Shkupi, Flora Gashi, duke kujtuar vitet kur nisi të shtrohej në spital, tregon se ndihej inferioriore dhe  skajshmërish e dalluar nga fëmijët-pacientët e tjerë.  Prindërit e kanë kuptuar sëmundjen e saj kur Flora ishte tre muajshe dhe pas trajtimit në spital gjendja u stabilizua kur i mbushi pesë vjeç. Komplikimet iu rishfaqën më vonë, kur sistemi i frymëmarrjes dhe mushkëritë furnizoheshin gjithnjë e më pak me oksigjen.

“Të gjithë e kishin të vështirë me mua e sidomos  në përdorimin e ilaçeve dhe terapive të ndryshme. Kur i bëja ato isha më mirë, ndërsa të kundërtën si pasojë e mos marrjes, si dënim e kisha bartjen e oksigjenit ngado që të shkoja. Por, pas konsultave me psikologët dhe psikiatërit, vërtet mora mbështetje dhe sigurinë emocionale dhe vendosa që të përballesha me sëmundjen”, thotë për KOHA, Flora. Prej disa vitesh ajo është përdoruese e rrjeteve sociale, ku falë mbështetjes psikologjike i tejkaloi barrierat dhe  sëmundjen e ktheu në një mjet për të përmirësuar shëndetin e saj. Deri në sigurimin e ilaçit për stabilizimin e fibrozës cistike.  “Të them të drejtën deri më tani nuk kam pasur paragjykime ose ndonjë bullizëm, por përkundrazi shokët dhe shoqet më kanë dhënë kurajë dhe mbështetje në tejkalimin e fazave dhe periudhave të ndryshme të krizave apo momenteve të caktuara. Natyrisht nga gjithë ajo përkrahje dhe aktiviteti të përbashkët të siguroj ilaçin, që ndoshta nuk është për kurimin e sëmundjes por që ndoshta 99 për qind do t’më lehtësojë gjendjen”, thotë Flora.

Historia e publikuar e Flora Gashit ka pasur bujë dhe ndikim të madh në tërë rrjetet sociale si dhe mediat e vendit, sidomos sensibilizimin shoqëror  dhe  atë institucional, por edhe duke përçuar mesazhin e dashurisë, humanizmit, përkrahjes dhe thyerjes së barrierave komplekse të individit.

Fibroza cistike është një çrregullim gjenetik (trashëgohet në familje) ku mukoza dhe gjëndrat e djersës sillen në mënyrë jonormale, për rrjedhojë  mukusi trashet mund të mblidhet në mushkëri dhe zorrë. Me kalimin e kohës një gjë e tillë shkakton dëmtime të përhershme të këtyre organeve. Të sëmurët prej fibrozë duhet të konsumojnë gati dy herë më shumë ushqim në ditë se sa një njeri i zakonshëm, ndërsa duhet të tregohet kujdes higjienik në mirëmbajtjen e inhalatorit. Po ashtu ilaçet për të sëmurët nga fibroza cistike nuk janë ilaçe që mund të blihen në shitje të lirë dhe për këtë arsye ekziston programi për sëmundje të rralla. Në Maqedoni Shoqata për fëmijët me fibrozë cistike vazhdimisht ka apeluar që mjekimet për këtë sëmundje urgjentisht të futen në Program, ku për momentin numërohen disa antibiotikë, si pulmozini, kolistini dhe tobramicini. (koha.mk)