Prindërit e një foshnje shtatë muajsh po sfidojnë mjekët në gjykatë për ta mbajtur në jetë të shtrenjtin e tyre, lidhur me pajisjet mbështetëse, pavarësisht shpresave të pakta për mbijetesë. BBC thotë se Connie Yates dhe Chris Gard thonë se u takon atyre dhe jo mjekëve të vendosin për djalin e tyre, Charlie, i cili po merr trajtim 24-orë në ditë në spitalin në rrugën “Great Ormond” në Londër, për një çrregullim të rrallë gjenetik. Mjekët thonë se foshnja duhet të lejohet të vdesë, pasi trupi i tij nuk kishte pranuar asnjë kurë. Por, prindërit e tij thonë se një trajtim pionier amerikan mund t’i shpëtojë jetën. Prindërit i thanë Victoria Derbyshire të BBC-së se do të vazhdojnë luftën për shpëtimin e fëmijës së tyre. “Ai luan gojën, luan duart. Ai nuk mundet t’i hapë plotësisht, por i hap sytë dhe na shikon. Ne nuk besojmë se ka dhimbje”, thotë çifti. Çifti, i cili jeton në Londër, kërkon ta dërgojë Charlie-n në SHBA, ku ata besojnë se mund të ketë shanse mbijetese nëse merr trajtime pioniere. “Ne vetëm duam të provojmë shansin tonë. Nuk do të jetë kurrë një kurë, por do ta ndihmojnë të jetojë”, thotë Yates, e cila shprehet se edhe nëse Charlie nuk ia del të mbijetojë, kjo mund të ndihmojë shkencëtarët të zhvillojnë më tej trajtimin dhe të shpëtojnë jetë të tjera. “Dua të shpëtoj të tjerët. Edhe nëse Charlie nuk ia del, nuk dua që ndonjë nënë tjetër dhe fëmijë të tjerë të kalojnë këtë që po kaloj unë”. Charlie, i cili lindi më 4 gusht, u pranua në spital pas zhvillimit të pneumonisë në rrugët e frymëmarrjes. Më pas ai u diagnostikua me sindromën e shterimit mitokondrial – që shkakton dobësimin progresiv të muskujve. “Ai është një nga 16 njerëzit në botë të prekur nga kjo sëmundje”, thotë Yates, e cila shpjegon se si ajo, si bashkëshorti kishin çrregullim në të njëjtin gen, diçka shumë-shumë e rrallë, dhe kjo ka sjellë pasoja edhe tek djali i tyre. E ëma e të voglit ka nisur një fushatë për mbledhjen e të ardhurave për shërimin e të birit. Deri më tani janë mbledhur 220.000 paundë britanikë, ndërsa ajo beson se duhet rreth 1.2 milionë paundë për të marrë trajtimin e duhur jashtë vendit. “Gjykatësit duhet të na besojnë ne, ne jemi prindërit e tij. Ne nuk duam që ai të vuajë. Nëse ai po vuan atëherë sigurisht që do e lija të ikte. Dikush tjetër në botë është i gatshëm ta marrë dhe ta ndihmojë, pse të mos e provojmë këtë?”. Një zëdhënës i spitalit në Londër thotë se Charlie ka një sëmundje shumë të rrallë dhe komplekse, për të cilën nuk ka asnjë kurë të pranuar . “Gjendja e tij është përkeqësuar dhe ne tani mendojmë se i kemi shteruar të gjitha mundësitë e trajtimit. Ne vazhdojmë t’i mbështesim prindërit e tij në çdo mënyrë që mundemi, teksa në krahun tjetër mbrojmë atë që ne besojmë se është më e mira për Charlien”, ka thënë zëdhënësi i spitalit.