Me shpërthimin e pandemisë së koronavirusit janë mbyllur disa reparte të klinikave si rrjedhojë e infektimit të stafit mjekësorë në shumë qytete të Maqedonisë së Veriut duke vënë në rrezik shëndetin e të sëmurëve kronik
Shkup, 8 prill – Në Maqedoninë e Veriut 10 për qind e të infektuarve me koronavirus nga numri i përgjithshëm janë pjesë e stafit mjekësor. “Kam përdorur maskë, dorëza dhe mjete dezinfektuese në çdo kohë, por megjithatë nuk iu shmanga infektimit nga virusi COVID-19”, rrëfen për Radion Evropa e Lirë, mjeku nga Dibra, Arben Agolli, i cili ishte ndër të parët që u infektua nga koronavirusi, bashkë me tri motra medicinale dhe një mjek që ishin pjesë e stafit të ambulancës në këtë qytet. Mjeku Arben Agolli i cili tashmë për tre javë vazhdon të kurohet në kushte shtëpiake, kolegët e tij i ka porositur që të jenë maksimalisht të kujdesshëm sepse, siç thotë, me e dhimbshme se vetë sëmundja është qëndrimi në shtëpi në këtë kohë kur më së shumti ka nevojë për mantel-bardhët.
“Do t’u thosha të gjithë kolegëve të mi që ta marrin me shumë seriozitet këtë punë. Te jenë shumë më të ndërgjegjshëm në radhë të parë për shëndetin personal dhe më pas për shëndetin e të tjerëve. Do të thotë në asnjë mënyrë të mos e neglizhojnë këtë situatë. Krahas rekomandimeve dhe protokolleve të OBSH-së, në këtë moment mjekët duhet të jenë shumë vigjilentë për tu kujdesur për shëndetin e tyre”, thotë Agolli.
Ndërkaq, ministri i Shëndetësisë, Venko Filipçe, dje në profilin e tij në Fejsbuk u bëri thirrje të gjithë qytetarëve që t’i mbrojmë punonjësit shëndetësorë sepse prej tyre varet shëndeti publik i jetëve tona. Gjithnjë, shkruan Filipçe, jepni përgjigje të sakta në anketat epidemiologjike, cilat janë simptomat e juaja,a keni pasur kontakt me person nga jashtë vendi ose me ndonjë person të sëmurë nga Kovid-19. “Me informacione të rreme i rrezikoni punonjësit shëndetësorë të cilët kujdesen për ju, por edhe për më të afërmit tuaj me të cilët për çdo ditë jeni në kontakt”, shkruan Filipçe, dhe shton se nëse dyshoni se jeni të sëmurë nga Kovid-19 ose keni simptoma karakteristike për virusin të bartni pajisje mbrojtëse dhe të mbani distancë. Kjo luftë, thotë ai,varet nga secili prej nesh. “Tani, si asnjëherë më parë duhet të tregojmë përgjegjësi. Ata për të gjithë ne,ne për të gjitha ata”, shkruan Filipçe në FB.
Por, ish-ministri i Shëndetësisë, Arben Taravari për Radion Evropa e Lirë thotë se një gjë tjetër është realiteti që thonë institucionet dhe një gjë krejtësisht tjetër është realiteti me të cilin përballen në praktikë mjekët gjatë ushtrimit të detyrës në kushte të pandemisë. “Mendoj se mjekët, infermierët dhe të gjithë punëtorët e shëndetësisë në këto ditë janë duke dhënë maksimumin e tyre. Nuk kam aspak dyshim në këtë gjë, por sa janë të mbrojtur kjo çështje është shumë diskutabile, nëse i pyesni institucionet ata thonë se punonjësit në shëndetësi janë të mbrojtur maksimalisht, por mjekët tregojnë se ka plot lëshime, tregojnë se ka mungesë të maskave, të dorëzave, të skafanderëve, të përgatitjeve të tjera mbrojtësë”, thotë Taravari. Pandemia me koronavirusin ka nxjerrë në pah mungesën e mjekëve të specializuar të infektologjisë dhe laborantëve.
Së fundmi është njoftuar për mungesën e infektologëve në Spitalin e Kumanovës. Në këtë qytet janë të infektuar 19 persona të personelit mjekësorë. Ekspertët e shëndetësisë thonë se numri i madh i të infektuarve të punonjësve të shëndetësisë është si rrjedhojë e mosndërmarrjes menjëhershme të masave mbrojtëse në të gjitha klinikat e vendit, ndërkohë që gjithçka u koncentrua në Klinikën e Infektologjisë në Shkup. “Në lëmi të ndryshme si staf mjekësor kemi mungesë të kuadrit të epidemiologëve sepse të qenit epidemiolog nuk tingëllon dhe aq atraktive si të jesh mjek kardiolog. Pra, duket se kemi lëshime të mëdha me vite në sistemimin dhe ekipimin e kuadrit mjekësor me kuadro të specializuara dhe pandemia duket se na ballafaqoi me shumë mungesa në këtë drejtim”, tha profesori Vladmir Borozanov.
Nga ana tjetër, Artan Dika, mjek në Klinikën e Shkupit për Radion Evropa e Lirë thotë se pavarësisht masave mbrojtëse, mjekët duke qenë se janë në vijën e parë të frontit mbeten më të ekspozuarit ndaj këtij virusi. “Kur ti ke kontakt me pacientë të cilët mund të jenë bartës të virusit ekziston rrezikshmëria që të infektohesh si mjek sepse bëhet fjalë për një virus që është i padukshëm dhe mund të jetë kudo dhe çfarëdo lloj masa që të ndërmerren rreziku ekziston”, tha Dika. Me shpërthimin e pandemisë së koronavirusit janë mbyllur disa reparte të klinikave si rrjedhojë e infektimit të stafit mjekësorë në shumë qytete të Maqedonisë së Veriut duke vënë në rrezik shëndetin e të sëmurëve kronik. (REL)