Denoncon në TV zhdukjen e familjes, por vrasësi është ai!

Chris Watts, 33 vjeç nga Kolorado, ka rrëfyer se ka qenë ai që ka vrarë gruan shtatzënë, Shanann Watts 34 vjeçe dhe dy vajzat e tyre, Bella e Celeste 3 e 4 vjeçe. Para se të pranonte krimin e trefishtë, ai kishte lëshuar një apel në Tv për gjetjen e familjarëve të tij. “Është një ankth, nuk arrij të jetoj pa ta”, i kishte thënë ai mediave sociale, para se të arrestohej nga policia.

Ka qenë një i afërm i Shananna-s që ka dhënë lajmin e rrëfimit. “Me dhimbje të thellë dhe zemërim, duhet të konfirmoj se kushërira jonë e bukur, fëmija që mbante në bark dhe dy vajzat e aj të mrekullueshme, Bella e Celeste, janë vrarë nga bashkëshorti i saj, i cili ka rrëfyer vrasjen”, ka shkruar në një komunikatë për mediat. Sipas shtypit lokal, policia ka konfirmuar nga ana e saj këtë gjë dhe është në dijeni të vendit ku janë varrosur viktimat. Chris ndërkohë është arrestuar. Arsyeja e krimit nuk është bërë akoma e qartë.

Megjithatë, sipas disa burimeve mediatike amerikane, Chris e Shananna, shtatzënë në javën e 15, kishin probleme ekonomike dhe kishin pasur një debat para aktit të tmerrshëm. Ishte pikërisht Chris ai që denoncoi zhdukjen e gruas dhe të vajzave të tyre. Ai pati thënë se i kishte lënë në shtëpi në mëngjes për të shkuar në punë dhe se nuk i kishte gjetur kur ishte rikthyer.

“Fëmijët e mi janë jeta ime, buzëqeshje e tyre ndriçojnë ditën time. Gjithçka është një ankth, nuk arrij të jetoj pa ta”, ishte apeli i tij për gjetjen e bashkëshortes dhe të fëmijëve. Pak orë më vonë vjen dhe rrëfimi tragjik.