Çudia “Balotelli”, nga “ekzili” 4-vjeçar në kapiten i Italisë!

Mund të duket paradoksale për mënyrën sesi kanë rrjedhur ngjarjet, por nëse zbatohen me përpikëri rregullat, atëherë Mario Balotelli do të jetë kapiteni i ri i Kombëtares së Italisë. Në mungesë të Gigi Buffon dhe De Rossit, lideri i ri i kaltër mbetet Leonardo Bonucci, por meqë mbrojtësi i Milanit me siguri nuk do t’i luajë të plota takimet e programuara para Botërorit, shiriti do t’i kalojë SuperMarios.

Tek Italia kapiteni i skuadrës zgjidhet në bazë të numrit të ndeshjeve (këtë praktikë ka ndjekur edhe Christian Panucci te kuqezinjtë) dhe hierarkisë, ndaj pas Bonuccit radha i vjen Balotellit. Roberto Mancini e riktheu në përfaqësuese, duke i rezveruar edhe një surprizë të këndshme, që do ta motivonte për të dhënë maksimumin dhe shmangur sjelljet e papërshtatshme, që e kanë penalizuar shumë në karrierën e tij.

Pra, në një nga tri miqësoret e para të epokës “Mancini”, kundër Arabisë Saudite, Holandës dhe Francës, nuk do të jetë çudi nëse shohim Balotellin me statusin e kapitenit.

Sulmuesi i Nice, i cili ka luajtur në 33 ndeshje me Italinë, është zyrtarisht zëvendëskapiten bashkë me De Sciglion (është 2 vjet më i vogël se Balo), diçka e pabesueshme kur mendon se vjen pas përjashtimit katërvjeçar nga përfaqësuesja.