Çanta më e shtrenjtë në botë kushton 6.7 milionë dollarë

Kjo është çanta më e shtrenjtë në botë. E ngjashme më shumë me një bizhuteri, vlera e saj arrin në 6.7 milionë dollarë. Çanta e pazakontë është krijuar nga stilistja britanike, Debbie Wingham. Ajo tregon se për këtë ide ka studiuar gjatë “Vezët Faberge”, të realizuara në vitet ‘800, nga argjendari Peter Carl Fabergé, i cili ishte frymëzuar nga oborri i Carit të Rusisë.

Çanta është krijuar duke përdorur bizhuteri dhe pjesë të ricikluara të tilla si 8000 diamante, vathë platin Cartier, 5 kilogramë flori 24 karatë dhe gjithashtu një shall Hermes, i cili ka shërbyer për pjesën e brendshme të saj.

Gurët më të shtrenjtë janë në pjesën e jashtme mes të cilëve tre diamante të rrallë në ngjyrë rozë, me vlerë 1.9 milionë dollarë dhe dy diamante të bardhë me vlerë 265 mijë dollarë. 37-vjeçarja Debbie Wingham është e njohur për krijimet e veçanta, si torta, fustani apo dhe këpucët më të shtrenjta në botë.