Shkup, 15 nëntor – Qeveria e Republikës së Maqedonisë në seancën e djeshme e shqyrtoi propozim-buxhetin për vitin e ardhshëm. Në suaza të seancës së 103 u paralajmërua se di të debatohet për Propozim-buxhetin për vitin 2019, si dhe për Propozim-ligjin për përmbarimin e buxhetit. Afati ligjor i Qeverisë është më së voni deri më 15 nëntor ta dorëzojë në Kuvendin e Republikës së Maqedonisë.
Siç kumtoi ministri i Financave Dragan Tevdovski, të ardhurat e përgjithshme në arkën shtetërore për vitin 2019 janë projektuar në 210,8 miliardë denarë, ndërsa shpenzimet e përgjithshme në 228,5 për qind, ndërsa shkalla e inflacionit është dy për qind. Deficiti buxhetor është projektuar në 2,5 për qind apo 17,7 miliardë denarë që është për 500 milionë denarë më pak krahasuar me këtë vit.
“Siguruam konsolidim të matur dhe të shkallëzuar fiskal. Nëse para dy viteve deficiti buxhetor ishte tre për qind nga BPV, tani e zvogëlojmë në 2,5 nga BPV dhe vlerësojmë se kjo është ulje serioze dhe hap i duhur. Nuk shkojmë drejt zvogëlimit radikal”, sqaroi Tevdovski.
Me konsolidimin e shkallëzuar fiskal, siç sqaroi Tevdovski, përgatitet vendi për atë që na pret në vitet 2020 dhe 2021, respektivisht pagesë e borxheve nga pushteti paraprak.
Sipas Qeverisë, buxheti për vitin 2019 do të sigurojë paga më të larta në shëndetësi, arsim dhe mbrojtje. më shumë para për reformat në mbrojtjen sociale dhe fëmijëve dhe sistemin pensional, si dhe mjete për vendosjen e “naftës së gjelbërt” në bujqësi.
Investimet kapitale janë projektuar në 25,7 miliardë denarë, ndërsa ministri i Financave pret që vitin e ardhshëm të përshpejtohet realizimi i këtyre projekteve.
“Ministria e Financave vazhdimisht bën presion në të gjitha institucionet të cilat kanë projekte të tilla, që t’i realizojnë. Shumë herë ata ballafaqohen me probleme të mëdha si dokumentacione projektuese dhe mirë është se në këtë moment një pjesë e madhe e problemeve të tilla janë zgjidhur te projektet e mëdha dhe presin se do të përshpejtohet realizimi i investimeve kapitale”, tha Tevdovski, duke iu përgjigjur pyetjes se çfarë do të jetë mekanizmi, i cili do të zbatohet që investimet kapitale të realizohen tërësisht.
Qeveria mbrëmë në seancë miratoi vendim të sigurojë fillimisht 98 milionë denarë në Buxhetin për luftë kundër ndotjes së ajrit.