Ministri i Ekonomisë Kreshnik Bekteshi, gjatë vizitës zyrtare të delegacionit qeveritar në Budapest, zhvilloi një takim joformal me zëvendësministrin e ekonomisë dhe zhvillimit të Republikës së Greqisë, Stergios Pitsiorlas. Në frymën e ndërtimit të marrëdhënieve dhe relacioneve miqësore fqinjësore, citohet në njoftimin zyrtar, u shprehën pritjet për promovimin dhe intensifikimin e bashkëpunimit midis dy vendeve në planin ekonomik, dhe siç u theksua, një vëmendje e veçantë do t’i kushtohet lidhjes energjetike dhe infrastrukturore të të dy vendeve.
Ministri i Ekonomisë Bekteshi tha se është interes i përbashkët që ekonomitë në të dyja vendet të shënojnë rritje, të përmirësohet cilësia e jetës së të gjithë qytetarëve dhe në këtë frymë është e rëndësishme që të intensifikohet bashkëpunimi. Gjatë takimit u vlerësua se të dy vendet në të ardhmen do të punojnë së bashku në projektet rajonale, të rëndësishme për interesin e qytetarëve të të dy vendeve.