BE kërkoi nga Shqipëria të fokusohet në reformat

Tiranë, 22 janar – Ambasadori i BE-së, Luixhi Soreca përsërit mesazhin që vendet e BE-së i përcjellin qeverisë për rezultate të prekshme në luftën kundër korrupsionit dhe krimit të organizuar.

“Ajo që shtetet anëtare presin nga Shqipëria u tha qartë qershorin e kaluar: Të konsolidojë progresin në përparësitë kyçe dhe veçanërisht të japë rezultate të prekshme dhe konkrete në luftën kundër korrupsionit dhe krimit të organizuar”, porositi Soreca.

Ambasadori nënvizoi se reforma në drejtësi bazuar në veting po funksionon dhe është e pakthyeshme por se duhet të ketë historik i vazhdueshëm ndjekjesh penale dhe dënime përfundimtare.

“Ka pasur operacione shumë inkurajuese të zbatimit të ligjit gjatë muajve të fundit, të cilat jo vetëm që duhet të vazhdojnë por edhe të ndiqen nga një historik i vazhdueshëm ndjekjesh penale dhe dënime përfundimtare. Po ashtu kohët e fundit kemi parë progres shumë të rëndësishëm lidhur me reformën në drejtësi, me piketën e ngritjes së institucioneve të reja, kjo shtron udhën për emërimin e gjyqtarëve në gjykatën e lartë si dhe për ngritjen e SPAK dhe BKH. Por ajo çka nënkupton thellësisht është se reforma e drejtësisë bazuar në veting po funksionon dhe është e pakthyeshme”, ka thënë Soreca, njofton Ora News.

Ai tha se BE ka mirëpritur shumë këto zhvillime të fundit, por duhet bërë më shumë.

“Koha është thelbësore dhe vendimi i qershorit nuk duhet të merret i mirëqenë. Nuk ka mbetur shumë kohë deri në etapat e ndryshme të pranverës do të ishte një gabim për Shqipërinë që të mos fokusohej për të bërë gjithçka që mund të bëjë vendi gjatë muajve të ardhshëm për tu paraqitur plotësisht i përgatitur”, nënvizon ai.