BDI e shqetësuar nga lidhjet e bandave të drogës me partitë, përkrah aksionet policore

Tetovë, 24 gusht – Bashkimi Demokratik për Integrim (BDI) përshëndet dhe përkrah aksionet policore anti-drogë në Gostivar dhe Tetovë dhe inkurajon institucionet e rendit që ta intensifikojnë edhe më tepër kontrollin e reptë, në veçanti në afërsi të shkollave, objekteve kulturore, fetare, etj, thuhet në kumtesën e lëshuar për media nga selia “blu”, transmeton gazeta KOHA.

“BDI thërret për zero tolerancë dhe luftë të pakompromistë ndaj bandave të drogës si kancer i shoqërisë. Njëkohësisht, BDI shpreh shqetësim të thellë për lidhjet e ngushta dhe strehimin politik që iu mundësohet bandave të drogës nga parti politike, siç është rasti i të arrestuarit të djeshëm në Tetovë me mbi 20 kilogram drogë. Lidhja e politikës me botën e krimit është e papranueshme për ne dhe për qytetarët andaj edhe organet e rendit duhet që të marrin masa të menjëhershme për ta parandaluar dyzimin e krimit dhe partive politike”, thuhet në kumtesën e BDI-së. (koha.mk)