Tiranë, 30 gusht – Lideri i partisë më të madhe opozitare shqiptare, Partisë Demokratike (PD), Lulzim Basha sot ndau një video-mesazh kundër kryeministrit Edi Rama, të cilin e fillon me konstatimin se “Shqiptarët sot janë më të varfër pasi janë të vjedhur”.
Thekson se “varfëria, papunësia, mungesa e mundësive vijnë nga grabitja që po i bëhet Shqipërisë nga Edi Rama me një grusht klientësh.”
“Paratë tuaja, paratë e shqiptarëve po i vjedh Edi Rama me familjen dhe miqtë e tij. Pasurohen të pushtetshmit dhe të pasurit, varfërohen njerëzit e thjeshtë dhe të pambrojtur. Miliarda euro janë vjedhur, abuzuar dhe shpërdoruar nga Edi Rama këto 6 vjet, të gjitha kanë përfunduar në xhepat e tij ose janë shpërdoruar për tekat e tij në fasada dhe luks, ndërsa shqiptarët nuk sigurojnë dot bukën e përditshme. Shqiptarët janë pa punë, sepse ekonominë dhe mundësitë ekonomike i kanë marrë oligarkët dhe klientët e Edi Ramës”, akuzon Basha në video-mesazhin e publikuar në profilin e tij në Fejsbuk.
Kreu i PD-së thekson se “Edi Rama është artist i mashtrimit.”
“Çdo gjë që ka premtuar, çdo gjë që ka thënë ka qenë mashtrim me qëllim për të vjedhur. Çdo projekt, program dhe politike është mashtrim për shqiptarët në shërbim të oligarkëve. Që të çlirojmë ekonominë dhe të hapim vende pune e mundësi për çdo shqiptar, duhet të largojmë hajdutin psikik dhe bandën e tij grabitqare”, shprehet Basha.