Barcelona e vendosur të blejë Kutinjon

Sipas raportimeve nga Spanja, Barcelona do të bëjë një përpjekje të re për të nënshkruar me brazilianin Filipe Kutinjo gjatë merkatos së janarit. “Mundo Deportivo” pretendon se udhëheqësit e klasifikimit në La Liga, janë të vendosur të finalizojnë suksesshëm transaksionin për blerjen e yllit të Liverpulit, pasi dështuan të gjejnë akordin me klubin anglez gjatë merkatos së verës. Ndërkohë, klubi nga “Merseyside” aludohet se e vlerëson Kutinjon me një çmim stratosferik, prej 134milionë euro, pasi në gusht refuzuan një ofertë finale në vlerën 114milionë euro.

Barça uronte që oferta e tyre finale të bindte dhe të pranohej nga Liverpuli, por Jurgen Klopp dhe hierarkia e të Kuqve refuzoi paratë në këmbim të 25-vjeçarit. Gjigantët spanjollë besojnë se vlera aktuale e pretenduar nga klubi anglez është jo reale dhe pritet të përdorin në negociatat e tyre lidhjen e Kutinjos me Çampions Ligë, si një taktikë dhe strategji diskutimesh. “Mundo Deportivo” pretendon gjithashtu se të interesuar për Kutinjo është edhe PSG, ndonëse transferimi në “Nou Camp” mbetet preference e vetë futbollistit. Liverpuli kërkoi 185milionë euro për ish-futbollistin e Interit, në afatin e fundit të merkatos së verës dhe thuhet se janë të gatshëm ta shesin gjatë janarit.