Aventurës te Atalanta i ka ardhur fundi

Berat Gjimshiti ka vendosur: aventurës te Atalanta i ka ardhur fundi. Këtë sezon, të paktën deri tani, nga 19 ndeshje në total që bergamaskët kanë zhvilluar, mbrojtësi shqiptar ka luajtur thuajse gjysmën (8 ndeshje, 537 minuta në fushë). Megjithatë, për lojtarin e lindur në Zyrih, kjo nuk mjafton. Ai kërkon të jetë protagonist dhe të konsiderohet si titullar.

Jo vetëm kaq, por një tjetër çështje për t’u diskutuar ka të bëjë me rrogën. Gjimshiti nuk është fort i kënaqur me kontratën që ka te bluzinjtë, duke qenë se fiton rreth 300 mijë euro në sezon. Interesimi i ardhur nga Turqia ka bërë që ai të mendojë seriozisht këtë transferim. Besiktas, klubi i interesuar, që dikur ishte pranë blerjes së Mërgim Mavrajt, është gati t’i ofrojë dyfishin e kontratës në sezon, por nuk ka ndër mend të paguajë kartonin e lojtarit. Kjo pasi kontrata e tij skadon në qershor të këtij viti dhe, sipas ligjit Bosman, Gjimshiti mund të akordohet që tani me klubin e të ardhmes, kur të jetë lojtar i lirë.Atalanta, në anën tjetër, për ta lënë të lirë që në janar, ka kërkuar 1 mln euro, një shifër e rëndësishme kjo, por e negociueshme. Megjithatë, Besiktas dhe Gjimshiti mund edhe të presin dhe të kryejnë këtë “martesë” në qershor, pa paguar asnjë para te klubi italian.