Besim ILJAZI
KOHA: Zotëri Sela, para se të dalim te programi politik i Lëvizjes për Reforma, së fundmi keni patur konfrontim me KSHZ-në rreth reklamimit! Ku është burimi dhe si qëndron problemi?
SELA: Burimi është se një makineri e tërë shtetërore, e cila është e orientuar dhe stërkëmbëzen në çdo hap të fushatës tonë elektorale. Ne, gjithçka që kërkojmë është të respektohet Ligji, asgjë më tepër dhe asgjë më pak. KSHZ në këtë drejtim, në bashkëpunim edhe me mediat, në bashkëpunim dhe me të tjerë mundohen që neve të na mbajnë jashtë syrit të opinionit shqiptarë. Ka, për shembull, një bilbord në Tetovë dhe po ta shihni se ku janë vendosur, është e tmerrshme. Përpara atij bilbordi një pemë dhe nuk duket aspak… Ne e dimë që ato përfaqësues politik të deleguar në KSHZ nuk janë të pavarur, por të gjithë janë politik. Nga subjektet politike të dërguar, të gjithë kanë interes që ne të mos kemi sukses si Aleancë shqiptare, por unë i garantojë se nuk do t’ja arrijnë dhe nëse kanë bërë shkeljen e Ligjit, një ditë do të përballen me drejtësinë.
KOHA: I kthehemi situatës, e cila solli deri te zgjedhjet. Përgjimet e publikuara e tronditën skenën politike dhe sollën deri të Marrëveshja e Përzhinos, respektivisht formimi i Prokurorisë Speciale dhe mbajtja e zgjedhjeve. Si e shihni nga kjo distancë gjithë këtë proces në të cilën kaloi Maqedonia?
SELA: Përgjimet dhe ajo që ndodhi me përgjimet dua të them se është nisja e një procesi që ka për qëllim dekriminalizimin dhe partizimin e institucioneve shtetërore. Fillimisht duhet nis me heqjen e kriminelëve nga institucionet që po udhëheqin dhe pastaj do të vijë dhe procesi i depolitizimit sidomos të institucioneve të drejtësisë dhe funksionimi normal i shtetit të së drejtës. Realisht i kemi dëgjuar liderët politik që s’e nxjerrin nga goja integrimin në NATO dhe BE në çdo fushatë elektorale, pas fushatës dhe gjatë kohës së qeverisjes, ndërsa në anën tjetër – nëse dikur për Maqedoninë kusht i vetëm ka qenë ndërrimi i emrit për t’u bë anëtare e NATO-s, sot nuk është vetëm çështja e emrit, sepse fundi i fundit – NATO është një standard, NATO është respektim ligji, respektim i të drejtave të njeriut… Të gjithë këto i mungojnë Maqedonisë. Nëse e shihni Raportin e takimit të fundit që ka pas NATO-ja, nuk ekziston problemi i emrit, por mundësia e shtetit të së drejtës. Realisht na duhej kuptuar krizën dhe të zgjidhej kriza më thelbësisht, andaj kam deklaruar se nuk është e mjaftueshme vetëm ajo që u arrit në Përzhino, sepse realisht – përveç caktimit të datës të zgjedhjeve të parakohshme, asgjë tjetër esenciale nuk është arrit. Nuk u diskutuan 3 ose 4 tema, e para – mungesa e balancit të votave në Njësitë zgjedhore dhe kjo është jo e drejtë, sepse njëfarë forme – votat e shqiptarëve për të zgjedh një deputet shqiptarë në Njësinë zgjedhore 6 duhen më tepër se sa për të zgjedh një deputet maqedonas në Njësinë 4.. E dyta, u diskutua për modelin zgjedhor – a do të jetë proporcional me listat e hapura ose të mbyllura, që më pas të ngelin përsëri lista të mbyllet proporcional në sistem. Dhe tema e tretë kryesore, ishte pastrimi i listave zgjedhore që ishte dhe burim i krizës në njëfarë forme, ku LSDM kontestoi zgjedhjet e 2014-ës me idenë që janë me qindra, mijëra votues fiktiv dhe këto votues fiktiv janë ata që u kanë dhënë fitoren VMRO-së. Me gjithë atë debat rezultoi përsëri me heqjen nga listat e votimit të rreth 39 mijë votuesve, të cilët 90 për qind janë shqiptarë e që nuk janë fiktiv, por janë njerëz që frymojnë dhe jetojnë këtu në Maqedoni. Të mos flasim për pjesën tjetër, ne e kemi ankimuar këtë në Gjykatën Kushtetuese dhe nuk kemi marrë përgjigje se si do të ndahen votuesit, është kushtetuese apo jo! Në votues me yje dhe votues pa yje dhe kjo është antikushtetuese, sepse krijon dy kategori votues. Edhe kjo nuk u zgjodh.
KOHA: Kthehemi dhe pak te përgjimet. Publikimi i përgjimeve nga opozita filloi sikur një betejë dhe faktikisht ishte ashtu – betejë brenda maqedonasve, në ndërkohë gjithë kjo u bart tek shqiptarët!
SELA: Unë jam deklaruar rreth kësaj çështje gati dy muaj përpara se të ndodhë “Lagjja e Trimave” dhe nuk duhet të jesh shumë inteligjent për të kuptuar, por vetëm duhet të kthehesh pak mbrapa në këtë histori 25 vjeçare të Maqedonisë. Çdoherë krizat politike në Maqedoni kanë përfunduar me procese të montuara politike kundër shqiptarëve. Kështu përfundoi dhe kjo krizë. “Lagjja e Trimave” ishte proces i montuar, i cili njëfarë formë e ndali shpalosjen e përgjimeve nga ana e opozitës maqedonase me arsyetim që do të destabilizohet shteti… Për mua ky arsyetim nuk mban dhe ashtu siç u shpalos “Sopoti”, do të duhej të shpalosej edhe “Monstra”, sepse krizë më të madhe se ajo që pamë në “Lagjen e Trimave” nuk mund të ekzistonte. Por siç duket, një është e përbashkëta ndërmjet VMRO-së dhe LSDM-së, gjë që vërehet në përgjimin për çështjen me Sopotin, ku ministri i policisë me shefin e sigurimit të shtetit po nga VMRO pranojnë se në montimin e “Sopotit” nga LSDM, nga Verushevski dhe nuk di kush ka qenë atëherë ministër i Punëve të Brendshme atëkohë, i futën dhe i mbajtën dhjetëra shqiptarë të pafajshëm nëpër burgje… e gjithë kjo për të ruajtur sistemin. Dhe unë them se minimumi që subjektet politike shqiptare, pjesë të bisedimeve që ishin në Përzhino, duheshte këtë të kërkojnë, asnjë bisedë mos të vazhdojnë më tutje derisa nuk nisen me goditjen dhe rrënimin e këtij sistemi që qenka i drejtuar kundër shqiptarëve në përgjithësi, sepse ne nuk mund ta dimë se kush do të jetë viktima e radhës nesër nëse nuk godasim mbi këtë sistem. Unë pres nga Prokuroria Speciale dhe reformat që pritet të ndodhin në drejtësi, të godasin krimin, i cili është i instaluar në institucione, e sidomos në Ministrinë e Punëve të Brendshme.
KOHA: Përmendët drejtësinë. E kemi Prokurorinë Speciale. A jeni optimist se kjo Prokurori do të ketë sukses, sepse tani kemi një përplasje rreth punës së saj mes LSDM-së dhe VMRO-së, dhe e gjitha po duket si një teatër për të nxjerr nën hije punën e saj?
SELA: Ne kemi qenë të vetëdijshëm prej në fillim që Prokuroria Speciale, vetëm si Prokurori nuk është e mjaftueshme për ti procesuar të gjitha ato aktpadi, të cilat ajo i gritë, sepse vendimet merren nga gjykatat, e që janë të politizuara dhe të kontrolluara nga Ali Ahmeti dhe Nikolla Gruevski në formën si emërohen gjykatësit. Në mënyrë që të hiqet dhe të përfundojë njëherë e përgjithmonë kjo dilemë e partive politike maqedonase dhe shqiptare në lidhje me fatin e Prokurorisë Speciale, ne kemi propozuar por që nuk u votua vazhdimi i mandatit të Prokurorisë Speciale dhe që nuk u votua Ligji për dëshmitarët e mbrojtur, ne propozuam që Prokuroria Speciale të bëhet kategori kushtetuese, dhe si e tillë pastaj nuk do të jetë objekt diskutimi i subjekteve politike nëse duhet të ekzistojë ose nuk duhet të ekzistojë. Por, përveç kësaj, duhet edhe në kuadër të Gjykatave Themelore të ketë njësi të veçanta, të cilat do të merren me krimin politik, gjë që duhet të jetë objekt i Prokurorisë Speciale dhe njësive të veçanta në Gjykatat Themelore. Domethënë, këtu mund të kishim një nisje të mbarë, në mënyrë që avash avash të luftohet krimi që është brenda institucioneve dhe të kthehet besueshmëria e qytetarëve tek institucionet e së drejtës.
KOHA: Të kthehemi tek bashkëpunimi opozitar. Është folur qindra herë. Cilat janë arsyet, pse nuk erdhi deri tek dalja e përbashkët mes Lëvizjes BESA dhe LR-PDSH? Ishin shkaqe parimore, apo mosmarrëveshje personale?
SELA: Po shpesh ma drejtojnë këtë pyetje. Por unë kur nuk e kam kuptuar. Më lejo që ta shpjegoj. Shpesh më drejtojnë edhe pyetje të tipit: Pse ka aq blloqe politike shqiptare dhe se do të përçahet vota shqiptare? Të vetmit subjekt që nuk është korrekte t’i drejtohet kjo pyetje është LR-PDSH, është RDK dhe është UNITETI, sepse ne e kemi bërë tonën dhe jemi bërë bashkë dhe kemi bërë një aleancë që quhet “Aleanca për shqiptarët”. Në qoftë se do ti kuptoja arsyet e BESËS, sot do ishim katër parti politike. Unë kurrë s’i kam kuptuar. Një gjë e di. Kanë qenë shumë të hapur për bashkëpunim, me njerëz që nuk e kanë patur në dorë bashkëpunimin. Nuk e di, me intelektualë të ndryshëm që kanë qenë pjesë e jona, publikisht kur kanë qenë vetëm ata vet. Në ndërkohë, kur është dashur që të vendoset dhe të bëhen pjesë e këtij bashkëpunimi opozitar, që të ulemi dhe ta bëjmë bashkëpunimin opozitar, ata pa ndonjë shpjegim vazhdimisht janë larguar nga ky bashkëpunim. Dhe tani, në këtë situatë, a e di pse them kurrë s’e kam kuptuar? Sepse, kur jemi ulur të flasim për Platformën, ata kanë bërë pishman veten dhe janë larguar, dhe nuk kanë dashur të ulen e të flasin për Platformën. Për listat, kur ne thoshim ejani të hyjmë të barabartë, ata kërkonin sondazhe. Kur ne thoshim ejani në sondazhe, ata kërkonin “ejani me kompromis”. E gjithë ideja ka qenë që nuk kanë dashur të jenë pjesë e këtij bashkëpunimi, dhe ka vetëm një shpjegim: siç duket ne kemi agjenda të ndryshme. Agjenda jonë është shumë transparente, fushata jonë politike i përshtatet nivelit të popullit, sepse ne dalim nga ky popull, menaxhohemi me mjete financiare minimale, dhe reflektojmë materialitet që ka populli shqiptarë, dhe agjenda jonë janë shqiptarët në Maqedoni. Ndërsa për agjendën e tyre dhe milionat e tyre, le të flasin ata vet. Por, mendoj që kjo ka qenë realisht problemi, sepse mendoj që, me ata që jemi ulur për të biseduar, nuk kanë patur mandatin për të biseduar për bashkëpunimin. Nuk është kryetar, dhe nuk ka mundur të vendosë për këtë çështje kryetari i Lëvizjes BESA, Bilall Kasami. Nuk ka patur pse në këtë çështje të vendosë as Këshilli Drejtues, sipas perceptimit tonë. As ata që thirren në Lëvizjen BESA, por njerëzit që kanë vendosur dhe kanë patur fjalën e fundit për këtë bashkëpunim kanë qenë ata që i kanë paratë dhe ata që ua japin paratë, dhe prandaj kemi hasur në vështirësi. Nuk do të hyjë në çështjen tjetër, në fund të fundit, obligimet e subjekteve politike quhen të tilla në momentin që kanë Kongres.
KOHA: Kështu unë tani dëgjoj argumentet e juaja, por populli dhe njerëzit e deshën shumë këtë bashkim. Faktikisht, tani po dalim me katër lista në disa Njësi zgjedhore, respektivisht me pesë lista. A mbartë LR-PDSH përgjegjësi në qoftë se parcializohet, ose të themi “digjet” vota shqiptare?
SELA: Nuk digjet vota shqiptare…
KOHA: E kam fjalën për Njësinë 1, 2, 5…?
SELA: Kuptova drejtë. Ne mbajmë përgjegjësi morale në lidhje me këtë proces, dhe udhëhequr nga kjo përgjegjësi që ne kemi, ne kemi bërë kompromise të nevojshme me të gjithë ata që bashkëpunimin opozitar e kanë dashur me gjithë mend. Unë e kam thënë edhe disa herë tjera, në qoftë se ka patur ndonjë shkak politik, po them, për të mos bërë bashkëpunim, duke patur parasysh se kemi qenë gjatë kohë kundërshtarë politik…. ka qenë UNITETI. Ndër simbolikat që ne kemi bërë bashkëpunimin me UNITETIN, flet që ne kemi qenë të hapur për çdo lloj bashkëpunimi opozitar, sepse këtë e kërkonte edhe popullata, dhe kjo ishte forma më e mirë që tani e gjithë opozita të ishte në pozicione tjera. Dëgjo. Për të bashkëpunuar duhen dy. Ne kemi qenë PRO, ndërsa Lëvizja BESA ka qenë kundër këtij bashkëpunimi, dhe janë munduar gjatë gjithë këtij procesi të nxijnë figurën time dhe Lëvizjen për Reforma PDSH. Më thoni kush është subjekti, i cili ka ndihmuar përçarjen e një subjekti tjetër politik? Nëse ishte e paqartë përçarja që ndodhi në RDK, për mua janë këta. Paqartazi, në momentin që kryetari i Lëvizjes BESA merr të drejtën të zgjedhë kryetarin e një partie tjetër. Unë nuk e kam patur këtë të drejtë, pesë gjashtë muaj sa ka vazhduar ky proces, vazhdimisht jam provokuar kush është për ty kryetari i RDK-së? Unë thosha se është çështje e anëtarësisë së RDK dhe unë nuk jam anëtar i RDK-së. Ndërsa, e thash edhe më herët, duhet t’ju drejtohet se tani në këto zgjedhje, ka një koalicion dhe ka tre parti politike që garojnë veç, për shqiptarët po flas. Në Njësinë zgjedhore numër 6 janë katër, dmth ka një koalicion me tre parti dhe tre parti të tjera që konkurrojnë vet dhe këtu shihni se kush nuk ka qenë për bashkëpunim. Në lidhje me parcializimin e votës dhe djegien e votës, që secila parti e përmend, në Maqedoni është krijuar një precedent që nga viti 2008, që për mua them është i vlefshëm, dhe unë prandaj kam insistuar që të ndodhë bashkëpunimi opozitar parazgjedhor, sepse unë dua ta ruaj këtë precedent. Pse? Është shumë e vlefshme si fuqi politike, në mënyrë që të realizojmë Platformën tonë politike. Një votë më tepër në mbrëmjen e 11 dhjetorit, sesa tre ose katër deputetë që do të bënim më tepër duke bërë kombinatorika për koalicionime, ku e di unë, Aleanca për shqiptarët, Lëvizja BESA, PDSH, e ku e di unë, ose Prosperiteti e gjithë këto partitë tjera politike, sepse këta pastaj e prishin një precedent. Ju kujtohet cili është, se fituesi hyn në Qeveri? Por ne themi, meqë ky precedent është krijuar, ne themi, që fituesi edhe s’hyn në Qeveri, kështu kot e kot si hyn Ali Ahmeti. Hyn në Qeveri në momentin që fillimisht pjesë të Platformës tonë politike bëhen pjesë të ndryshimeve kushtetuese dhe ligjeve që duhet sjellë, është formë. Por njësoj si në vitin 2008 kur u kushtëzua BDI të hyjë në Qeveri për të votuar 200 ligje. Edhe ne këtë do të kushtëzojmë, kushdo që të jetë mandatari nesër nga pala maqedonase, do t’i duhet t’i votojë këto ligje që janë në të mirën e shqiptarëve, në mënyrë që pastaj mund të bëhet qeverisje. Prandaj them, deri në çfarë është djegia e votës? Djegia e votës është kur premton para popullatës dhe kur nuk e mban asnjë premtim. BDI në vitin 2014 mori 153.000 vota dhe nuk ka mbajtur asnjë premtim nga ajo që premtoi në vitin 2014. Djegie më e madhe e votave se çdo votë që i shkon BDI-së nuk ka. Ne morëm vetëm një periudhë 2014-2016. Në qoftë se i mbledhim gjithë periudhat që ata kanë marrë mandat dhe kanë qenë në Qeveri, janë miliona vota të djegura dhe mandate deputetësh. Kështu që, mendoj që nuk do të ndodhë humbje e shumë deputetëve, sepse në fund të fundit – këto mandate sado që të jetë numri i deputetëve, nuk e ulë numrin e popullatës shqiptare.
KOHA: Nuk desha t’ju ndërpres, por pretendimi për ndërhyrje i BESËS në shkëputjen e RDK-së, thuhet të jetë e njëjtë me mënyrën tuaj brenda PDSH-së?
SELA: Nuk është e njëjtë kjo. Nuk është e njëjta. PDSH është subjekti ku unë kam qenë anëtar i zgjedhur prej bazës së partisë. Nga Struga. Në qoftë se e merrni në aspekt të vulave – po, keni të drejtë. Do të thotë unë kam qenë anëtar i PDSH-së, i bazës, i deleguar për delegat Kongresi, i zgjedhur në Kuvendin qendror të partisë, dhe prej Kuvendit qendror kam qenë i zgjedhur në Kryesinë qendrore të partisë. Në lidhje me atë temë se çfarë ndodhi në PDSH, unë nuk kam patur asnjë vërejtje që Menduh Thaçi të më përjashtojë si anëtar i Kryesisë qendrore, por nuk mund ta marrë të drejtën të më përjashtojë si anëtar i partisë. Ju e dini që ai para zgjedhjeve të vitit 2014, më ka përjashtuar në Kryesi qendrore si anëtar i PDSH-së. Nuk e ka këtë të drejtë. Me Statut ishte e rregulluar dhe është e qartë: iniciativën e merr Dega dhe Dega pastaj i propozon Kryesisë qendrore që të përjashtojë ndonjë anëtar. Ashtu ka qenë atëherë. Ne tani, nuk përjashtojmë asnjë, sepse vlerësojmë që partitë janë pronë e popullit dhe jo të individëve, dhe në momentin që fillon të përjashtosh anëtar, do të thotë ke nisur procesin e privatizimit të partisë. Do të thotë, aspak nuk gjanë me atë që ndodhi si iniciativë dhe si reformë brenda PDSH-së. Pastaj, ne nuk dolëm e thamë se jemi PDSH. Ne në fillim dolëm dhe folëm me anëtarësinë dhe i kemi bërë apel publik Menduh Thaçit që eja Kongresin ta bëjmë bashkë, në mënyrë që ne ti debatojmë problemet që ne i kemi në Kongres. Të diskutojmë. Kongresi i partisë është ai që zgjidhë problemet e brendshme që ka një subjekt politik. Menduh Thaçi nuk e pranoi këtë dhe bëri Kongres në tetor, edhe pse afati i rregullt i Kongresit ishte marrë viti 2015, duke patur parasysh se çdo katër vjet bëhet Kongres partie. Nuk ka marr vendim Kuvendi qendror për shpalljen e Kongresit të PDSH-së, por ka marrë vendim Orhan Ibrahimi me urdhër të Menduh Thaçit, dhe ne ja kemi dhënë të drejtën ti themi vetes PDSH pasi e bëmë Kongresin në muajin mars të vitit 2015. Ka patur një proces gjyqësor, do të thotë që të kërkojmë vulat, proces që ne e humbëm, dhe nuk kemi pritë që të ndodhë ndryshe, dhe pastaj nuk do rrinim dhe të aplaudojmë dhe të shohim se çfarë do të bëjë Menduh Thaçi… dhe i hymë dhe regjistruam parti politike. Kështu që, nuk ngjanë aspak kjo punë nëse duhet të krahasohet.
KOHA: Ajo që dua t’ju pyes është se LR-PDSH për bazë, si shtyllë kryesore të Platformës së saj, ka shtetin binacional. Çfarë nënkuptoni ju me këtë? Si do ta bëni? A shihni ndonjë partner te pala maqedonase që do të ketë mirëkuptim për këtë që e thoni?
SELA: Nuk dua të bëj hipokritin dhe të them se PO, ka partner te pala maqedonase, sepse partner te pala maqedonase nuk ka për të ndryshuar edhe një emër shkolle. Partner te pala maqedonase nuk ka për të ndryshuar edhe një emër rruge, dhe neve vazhdojmë ende ti mbajmë emrat e rrugëve të kohës së komunizmit. Jugosllavia nuk është askund, dhe plot ke rrugë në qytete me shumicë shqiptare që e kanë emrin “JNA”. Domethënë, nuk është ndarë akoma nga ish-sistemi qytetet vetëm e vetëm se…, sepse maqedonasit në këshilla atje ku janë, të komunave, nuk duan asnjë emër shqiptari ta dëgjojnë në rrugën e tyre, në qytetin ku jetojnë bashkë. Kjo flet për qasjen që ata kanë ndaj nesh. Ata çdo ditë na e përmendin ndarjen. Ata kanë qasje refuzuese vazhdimisht ndaj nesh. Ata çka nuk bëjnë, në mënyrë që ne ti lëshojmë trojet tona. Ata nuk na duan neve, ata i duan trojet tona. Nuk pretendojmë që të gjejmë partner. Po si thoni ju? Ne të heshtim e të mos e themi të vërtetën në sy? Ne kur përmendim federalizëm, atëherë prekeshkan ndjenjat e maqedonasve, dhe për mua është absurde, sepse ata ndërhyjnë dhe mundohen avash avash të na kufizojnë dhe në atë që flasim. Nuk është ky sistem i censurës të të menduarit dhe të shprehurit, të paktën në letër, ku e di unë, të paktën deklarativisht me ato gjërat të cilat janë bërë pjesë e Kushtetutës në momentin që Maqedonia pranoi sistemin e vlerave perëndimore dhe demokratike. Dhe tani, realisht, a është e ndarë Maqedonia? Është. Kalo Urën e Gurit në Shkup dhe do të shohësh Federatën e Maqedonisë Perëndimore që eksploatohet nga Federata shumicë e Maqedonisë Lindore. Se a do të kemi partner tek pala maqedonase, nuk na shqetëson ajo. Ne partner llogarisim shqiptarët dhe subjektet politike shqiptare që kanë të bëjnë me atë që e sqarova më herët. Prandaj, duhet të bashkojmë vullnetin e shqiptarëve më 12 dhjetor nëpërmjet tryezës së përbashkët të subjekteve politike shqiptare, për të cilën unë kam bërë një ofertë publike për gjithë partitë që tani ta nënshkruajnë këtë marrëveshje, më 10 dhjetor, më 9 dhjetor, në mënyrë që pa e ditur akoma rezultatin se kush është, në mënyrë që mos të ndjehet askush i thirrur nga dikush tjetër, megjithëse ju them, ai që do të marrë legjitimitetin, unë i bëj apel publik, ai ka të drejtën që t’i ftojë partitë politike shqiptare në një tryezë të përbashkët. Partitë politike shqiptare opozitare kanë obligim moral ndaj votuesve të tyre që ti përgjigjen asaj ftese. Nëse ai s’e bënë, ai që do të jetë i pari i opozitës ka të drejtë që të mbledhë opozitën bashkë dhe ta bashkojë opozitën. Deri tani, ndoshta edhe kjo ka qenë një ndër shkaqet të mosbashkëpunimit opozitar se nuk është ditur kush është ai i pari. Të vegjlit kanë komplekse. Unë kurrë nuk e kam patur këtë kompleks, dhe prandaj ndoshta deri diku, nuk ndodhi edhe kjo. Kështu që është verdikti, njëherë duhet të bashkohen shqiptarët, pastaj pak rëndësi ka disponimi i maqedonasve.
KOHA: Çka pas 11 dhjetorit? A do të ndodhin çudira? Ku e sheh LR-PDSH veten?
SELA: Më 12 dhjetor, që thatë LR-PDSH, ne jemi “Aleancë për shqiptarët” dhe kemi një marrëveshje të shkruar me partnerët që i kemi në koalicion dhe ky bashkëpunim do të zgjasë minimumi katër vjet. Prandaj, pyetje më korrekte do të ishte, ku e sheh veten “Aleanca për shqiptarët” më 12 dhjetor. E shohim veten si bartës të legjitimitetit. Më 12 dhjetor ne shpresojmë që thirrjes sonë për bashkëpunim me subjektet politike shqiptare do t’i përgjigjen të gjitha subjektet politike shqiptare që do të kenë deputetë në Parlament…