Tiranë, 25 korrik – Aleanca për mbrojtjen e Teatrit dhe partia opozitare Partia Demokratike kanë nënshkruar sot një marrëveshje që synon mbrojtjen e godinës aktuale të Teatrit Kombëtar.
Artistët dhe opozitarët kanë rënë dakord të mos lejojnë zbatimin e projektit të përzgjedhur nga qeveria për ndërtimin e një Teatri të ri.
Para protestuesve brenda sallës së Teatrit Kombëtar, teksa është lexuar teksti i marrëveshjes mes palëve, zotimi është ruajtja e gjithë kompleksit me dy godinat, Teatrin Kombëtar dhe atë Eksperimental.
Kontrata përmban 6 pika, në të cilat Aleanca angazhohet të vijojë pa ndërprerje mbrojtjen për Teatrin, ndërsa PD dhe opozita për të mbështetur këto aksione në mbrojtje të ndërtesës dhe të pronës publike.
PD angazhohet gjithashtu, se në muajin e parë të qeverisë së saj, kompleksit Skënderbe, ku bën pjesë Teatri, do t’i rikthehet statusi Ansambël Monument Kulture dhe do t’i nënshtrohet menjëherë ruajtjes dhe restaurimit.
Partia Demokratike dhe Opozita e Bashkuar, angazhohen të shfuqizojnë ligjin special antikushtetues “Rama-Fusha” që shemb Teatrin dhe të vendosë para përgjegjësisë penale çdo person të përfshirë në grabitjen kriminale të truallit të Teatrit Kombëtar.
Basha në një fjalim para qytetarëve tha se i falënderon për shembullin e jashtëzakonshëm, heroik qytetar dhe evropian që i treguam mbarë botës me qëndresën tonë, që me Aleancen për Teatrin, kauzën më fisnike, mirënjohje për sakrificën tuaj.
Edmond Budina, aktor dhe regjisor i njohur, njëri nga nismëtarët kryesorë për mbrojtje të teatrit, deklaroi se kjo marrëveshje bëhet e rëndësishme kur të gjithë do ta nënshkruajnë.