Bashkimi Demokratik për Integrim mbrëmë ka qëndruar në fshatin Forinë ku para banorëve ka shpalosur qëndrimin se pse duhet votuar me 30 shtator në referendum PËR Maqedoninë Evropiane pasi do të hapet rruga për anëtarësim në NATO. Kryetari i BDI-së, Ali Ahmeti, ju sqaroi banorëve të fshatit Forinë se vendi gjendet në një moment të rëndësishëm dhe të papërsëritshme pasi 30 shtatori është datë historike. “Qytetarët janë të përgjegjshëm dhe të ndërgjegjshëm se me 30 shtator nuk votohet një marrëveshje e rëndomtë në mes dy vendeve, nuk votohet një kompromis i arritur por votohet ardhmëria, historia e këtij vendi se a do të jetë në NATO dhe BE dhe se a do të fitojnë forcat progresive ose regresive. Unë jam shumë i sigurt që forcat progresive do të fitojnë me 30 shtator pasi të gjitha partitë politike kanë patur pjesë të programit të tyre anëtarësim të vendit në NATO dhe BE. Ky është një moment historik për të gjithë qytetarët e Maqedonisë pasi ardhja e diplomatëve të huaja në vendin tonë është një konfirmim i miqësisë prandaj ne duhet të votojmë PËR Maqedoninë Evropiane me 30 shtator”, potencoi kryetari i BDI-së, Ali Ahmeti. Bashkimi Demokratik për Integrim gjatë ditës së sotshme aktivitetin e radhës në kuadër të fushatës për referendum do ta vazhdoj në Komunën e Tearcës dhe para banorëve të fshatit Cegran.